დღეს, 3 ოქტომბერს, ხარაგაულის მუნიციპალიტეტის სოფელ კიცხში საქართველოს იუსტიციის მინისტრმა თეა წულუკიანმა საზოგადოებრივი ცენტრი გახსნა.

ამიერიდან საზოგადოებრივი ცენტრის მომსახურებით კიცხის ზონის მოსახლეობაც ისარგებლებს. ეს ხარაგაულის მუნიციპალიტეტში რიგით მესამეა, ხევისა და ღორეშას საზოგადოებრივი ცენტრების შემდეგ.

საზოგადოებრივი ცენტრი მნიშვნელოვნად ზოგავს ადგილობრივთა დროსა და ფინანსებს. სოფლის მოსახლეობას ის სახელმწიფო და კერძო სექტორის 200-ზე მეტ სერვისს, გამარტივებულ პროცედურებს, საინფორმაციო ტექნოლოგიებზე წვდომასა და თანამედროვე ინფრასტრუქტურას სთავაზობს.

კიცხის საზოგადოებრივ ცენტრში, ამ ზონის მცხოვრებლები არა მხოლოდ საჯარო სერვისებით არამედ „მაგთისა“ და „ლიბერთი ბანკის“ მომსახურებითაც ისარგებლებენ, რაც პენსიონერებს – პენსიის სოფლიდან გაუსვლელად მიღების, ახალგაზრდებს კი უკაბელო ინტერნეტით უფასოდ სარგებლობის საშუალებას მისცემს.

იუსტიციის მინისტრ თეა წულუკიანის თქმით, კიცხის საზოგადოებრივი ცენტრი საქართველოში რიგით მეორმოცე ცენტრია.

საზოგადოებრივი ცენტრის გახსნას იმერეთის გუბერნატორი გივი ჭიჭინაძე და ადგილობრივი ხელისუფლების წარმომადგენლები ესწრებოდნენ.

პროექტი ევროკავშირის ფინანსური მხარდაჭერით ხორციელდება.

თამთა გოგოლაძე

kitshkhi-3 kitshkhi-5 kitskhi-1 kitskhi-2 kitskhi-6