როგორ ემზადებიან ხარაგაულელი მოსწავლეების მშობლები ახალი სასწავლო წლისათვის, ფინანსურად რამდენად მძიმეა მათი ოჯახებისათვის სასკოლოდ შვილების მომზადება, – ამ შეკითხვებით რამდენიმე მათგანს მივმართეთ.

თამარ იჩქიტიძე: -სკოლებში ფორმები შემოიღეს და სახელმძღვანელოებსაც უფასოდ გვირიგებენ. ამიტომ სასკოლო სამზადისის ხარჯები შემცირდა. ჩემი შვილი მეთერთმეტე კლასშია და შარშან შეძენილ სასკოლო ნივთებს გამოიყენებს.

maia_kiknadze

მაია კიკნაძე: -ჩემი უფროსი შვილი, მარიამი, ხარაგაულის #3 საჯარო სკოლის მოსწავლეა. რადგან სახელმძღვანელოებსა და ფორმას სკოლა უზრუნველყოფს, მხოლოდ რვეულებსა და სასკოლო ნივთებში დამჭირდება თანხის გადახდა.

მეორე შვილი, თენგო, გიმნაზიაში სწავლობს და ალბათ მასაც მისცემენ სახელმძღვანელოებს. ასე რომ, წელს არა მგონია, სკოლისათვის მოსამზადებლად ბევრი დანახარჯი გვქონდეს.

 

qetino_kharadze

ქეთევან ხარაძე: -ჩემმა შვილმა ხარაგაულის გიმნაზიაში თეთრი პერანგითა და შავი შარვლით უნდა იაროს. ამიტომ სასკოლოდ მრავალფეროვან ტანსაცმელს აღარ ვყიდულობ. იმედი მაქვს, სახელმძღვანელოებს სკოლაში დაგვირიგებენ.

წიგნები, რომლებიც სკოლაში არ ექნებათ, აუცილებლად უნდა შევიძინოთ. ამას ემატება სასკოლო ნივთების შეძენა, რაც, ოჯახის ყოველდღიურ ხარჯებთან და გადასახადებთან ერთად, ბევრი ხარაგაულელი ოჯახისათვის მძიმე ტვირთია.

gizo_buachidze

გიზო ბუაჩიძე: -სასწავლო პროცესისათვის შეძლებისდაგვარად ვემზადებით. როცა საქმე სწავლას ეხება, დანახარჯებს აღარ ვანგარიშობ. ისე, თანდათან ყველაფერი ძვირდება და ცხოვრება ჭირს.

 

teimuraz_khijakadze

თეიმურაზ ხიჯაკაძე: -სასწავლო პროცესისათვის აქტიურად ვემზადებით. შვილებს სასკოლო ნივთები და ტანსაცმელი უნდა შევუძინოთ. სახელმძღვანელოებს სკოლაში ურიგებენ და ეს ძალიან დიდი შეღავათია. ერთი ბავშვის სასკოლოდ მომზადება დაახლოებით 100 ლარი დამიჯდება. ეს ჩემი ოჯახისათვის საკმაოდ მძიმე ტვირთია, რადგან სასკოლო ასაკის ორი ბავშვი მყავს.