დღეს, 26 აგვისტოს, ვახანში დოღში, ქართულ ჭიდაობასა და მკლავჭიდში ტრადიციული შეჯიბრებები გაიმართა.

სპორტულ შეჯიბრებებში ვახანელ ახალგაზრდებთან ერთად სპორტსმენები ხარაგაულის სოფლებიდან და სხვადასხვა მუნიციპალიტეტებიდან მონაწილეობენ.

დოღში ჩრდილელმა მიხეილ დალალიშვილმა  გაიმარჯვა.

ყველაზე ტექნიკურ მოჭიდავედ ვახანელი შმაგი ცუცქირიძე, საუკეთესო მებრძოლად კი – ხარაგაულელი ევსევი შველიძე დასახელდა.

ყველაზე ტექნიკური მკლავჭიდელის ტიტული კიცხელმა მალხაზ სარალიძემ მოიპოვა.

ტრადიციული ტურნირი ვახანში 1991 წლიდან ტარდება. 2012 წელს ტურნირს ტრაგიკულად დაღუპული რეინჯერის, მერაბ არევაძის, სახელი მიენიჭა.

ტურნირი ხარაგაულის გამგეობის განათლების, კულტურის, სპორტისა და ახალგაზრდულ საქმეთა სამსახურისა და სპორტის განვითარებისა და მართვის მუნიციპალური ცენტრის ხელშეწყობით ჩატარდა.

სპორტულ დღესასწაულს ხარაგაულის მაჟორიტარი დეპუტატი ნოდარ ებანოიძე და ადგილობრივი ხელისუფლების წარმომადგენლები ესწრებოდნენ.

ხარაგაულის მუნიციპალიტეტის გამგებლის მოვალეობის შემსრულებელი პაატა გოგოლაძე მოხარულია, რომ ხარაგაულში ასეთი ტრადიციული სპორტული დღესასწაული იმართება. „იმედი მაქვს, მსგავსი ტურნირები ხარაგაულის მუნიციპალიტეტის სხვა ტერიტორიულ ერთეულებშიც ჩატარდება“.

თამთა გოგოლაძე

vaxanoba (1) vaxanoba (4) vaxanoba (6) vaxanoba (10) vaxanoba (12) vaxanoba (14) vaxanoba (18)