მიკრო და მცირე მეწარმეობის ხელშეწყობის პროგრამის ფარგლებში ხარაგაულში 21 ბიზნეს გეგმა დაფინანსდება.

ხარაგაულის, ზესტაფონისა და ვანის მუნიციპალიტეტებში პროგრამის ბიზნესის განვითარების ოფიცერის, ჭაბუკი ჭეიშვილის, ინფორმაციით, ხარაგაულელ გამარჯვებულთა შორისაა 13 ამხანაგობა და 8 ინდმეწარმე.

მისივე თქმით, ხარაგაულელები ძირითადად მომსახურების სფეროთი დაინტერესდნენ.

„ბიზნეს იდეები სასტუმროების, კვების, ავტოშემკეთებელი, ავტოსამრეცხაო ობიექტების შექმნას, ჩირის წარმოებას და მომსახურების სხვა დარგების განვითარებას ეხება,“ – განმარტავს ჭაბუკი ჭეიშვილი.

პროგრამის ფარგლებში გამარჯვებულები მიიღებენ თანადაფინანსებას იდეის განსახორციელებლად. ერთი მეწარმე 5 000 ლარამდე თანხით დაფინანსდება, ორი მეწარმე – 10 000 ლარამდე, სამი მეწარმე – 15 000 ლარამდე.

გასულ წელს პროგრამის ფარგლებში ხარაგაულის მუნიციპალიტეტში შვიდი ინდმეწარმისა და ხუთი ამხანაგობის პროექტი დაფინანსდა.

მიკრო და მცირე მეწარმეობის ხელშეწყობის პროექტი სახელმწიფო პროგრამის „აწარმოე საქართველოში“ ფარგლებში ხორციელდება.