საინტერესო და მხიარული, დამეგობრების, გართობის, სპორტული და ინტელექტუალური შესაძლებლობების გამოვლენის საუკეთესო საშუალება, – ხარაგაულში გამართული სათავგადასავლო ტურ-თამაშები მონაწილეებმა ასე შეაფასეს.

სათავგადასავლო ტურ-თამაშები, ხარაგაულის მუნიციპალიტეტის განვითარებისა და შიდა ტურიზმის ხელშეწყობის ცენტრის ორგანიზებით, უკვე მესამე წელია, ტარდება.

ტურ-თამაშების პირველ ტურში მონაწილე ხარაგაულის 15 საჯარო სკოლის გუნდიდან ფინალის საგზური ხარაგაულის #2 საჯარო სკოლის გუნდმა „იმედი“ და ვახანის საჯარო სკოლის გუნდმა „არგო“ მოიპოვეს.

ფინალში, რომელიც ბორჯომ-ხარაგაულის ეროვნულ პარკში, მარელისის ხერგილზე გაიმართა, ხარაგაულელებთან ერთად ზესტაფონის, თერჯოლისა და ჭიათურის მუნიციპალიტეტებიდან თითო-თითო სკოლის გუნდი მონაწილეობდა.

„ამ კონკურსს დამარცხებული არ ჰყავს, – აღნიშნა გუნდების დაჯილდოებისას ტურ-თამაშების ორგანიზატორმა, გამგებლის მრჩეველმა ტურიზმის საკითხებში, მამუკა ჭიპაშვილმა, – ფინალისტებმა რთული დაბრკოლებები გადალახეს და საინტერესოდ იასპარეზეს.“

ტურ-თამაშებში მესამე ადგილზე ხარაგაულის #2 საჯარო სკოლის გუნდი გავიდა, მეორე ადგილი წილად ხვდა ზესტაფონის მუნიციპალიტეტის საქარის საჯარო სკოლის გუნდს „იშვიათი იმერლები.“

წლევანდელი ტურ-თამაშების პირველი ადგილის მფლობელია თერჯოლის მუნიციპალიტეტის სოფელ ძევრის საჯარო სკოლის გუნდი „მაკლეინ ჯორჯია.“

ფინალისტების დაჯილდოება ხარაგაულის კინოთეატრში გაიმართა. კონკურსის ყველა მონაწილე გუნდი სამახსოვრო საჩუქრებითა და სიგელებით დაჯილდოვდნენ.

ნინო კაპანაძე

ფოტოებზე: ტურ-თამაშები მერლისის ხერგილზე, ფინალისტების დაჯილდოება

tur-tamashebi-8 tur-tamashebi-7 tur-tamashebi-6 tur-tamashebi-5 tur-tamashebi-4 tur-tamashebi-3 tur-tamashebi-1