ხარაგაულის ცენტრალურ ბიბლიოთეკაში ბორის, ხიდრისა და კიცხის საჯარო სკოლების მოსწავლეებმა, რეჟისორ ირინე ჩხეიძესთან ერთად, გიორგი ლეონიძის „ნატვრის ხე“ განიხილეს.

შეხვედრა არასამთავრობო ორგანიზაცია „აკმეს“ პროექტის „წიგნი სიყვარულია“ ფარგლებში გაიმართა.

ა/ო „აკმეს“ მოხალისე და პროექტის, „წიგნი სიყვარულია,“ კოორდინატორი გვანცა ბერაძე ამბობს, რომ  ეს პროექტი 2014 წელს ქუთაისის მე-15 საჯარო სკოლამ დაიწყო.  ამავე წელს პროექტში ჩაერთენ ბორის, კიცხისა და ხიდრის საჯარო სკოლები. ა/ო „აკმეს“ წარმომადგენელი ფიქრია ხაჭაპურიძე ამბობს, რომ ეს პროექტი თანამედროვე, კომპიუტერის ეპოქის ახალგაზრდებს, წიგნთან დააახლოებს.

„ვფიქრობ, მოსწავლეებისთვის საინტერესოა ასეთი ფორმით წიგნების განხილვა, რადგან მათ სურვილი უჩნდებათ მეტი იკითხონ,“ –  ამბობს ბორის საჯარო სკოლის ბიბლიოთეკარი, პროექტის კოორდინატორი დონარი ბერიძე.

ცენტრალურ ბიბლიოთეკაში შეხვედრა საბიბლიოთეკო კვირეულის ფარგლებში მოეწყო. კვირეული ყოველწლიურად მთელი ქვეყნის მასშტაბით საბიბლიოთეკო ასოციაციის ეგიდით იმართება.

bori1