ხარაგაულის მუნიციპალიტეტმა წიფის, ზვარის, ჩრდილისა და ნადაბურისთვის მაღალმთიანის სტატუსის აღდგენის მოთხოვნით რეგიონული განვითარებისა და ინფრასტრუქტურის სამინისტროს მიმართა.

„იმერეთის სამხარეო ადმინისტრაციიდან გაიგზავნა ჩვენი შუამდგომლობა, – ამბობს ხარაგაულის მუნიციპალიტეტის გამგებლის მოადგილე დავით დევდარიანი, – ინფრასტრუქტურის მინისტრის მოადგილე თენგიზ შერგელაშვილისგან მივიღეთ პასუხი, რომ ჩვენგან გაგზავნილი დოკუმენტები მთის განვითარების ეროვნულ საბჭოს წარუდგინეს.“

მთის განვითარების ეროვნული საბჭოს მდივნის, ოთარ კონჯარიას თქმით, საბჭოში წარდგენილია 400-ზე მეტი შუამდგომლობა სხვადასხვა დასახლებებისთვის სტატუსის მინიჭების თაობაზე.

„ამჟამად განვიხილავთ წარმოდგენილ შუამდგომლობებს. მიმდინარეობს ინფორმაციებისა და მონაცემების გადამოწმება, თუ რამდენად აკმაყოფილებენ აღნიშნული დასახლებები მთის განვითარების ეროვნული საბჭოსგან დადგენილ კრიტერიუმებს, – ამბობს ოთარ კონჯარია, – საბჭო, უახლოეს სხდომაზე, რომელიც აპრილის ბოლოს გაიმართება, იმსჯელებს ამ დასახლებებისთვის სტატუსის მინიჭებაზე.“

შეგახსენებთ, რომ 2016 წლიდან მაღალმთიანის სტატუსი ხარაგაულის მუნიციპალიტეტის ექვს სოფელს – ნუნისს, პატარა სახვლარს, გოლისს, გოლათუბანს, გუდათუბანსა და ფონას მიენიჭა.

ნინო კაპანაძე