ხარაგაულში, 9 აპრილის ქ. #18-ში მცხოვრები ელენე პაქსაშვილის ხუთსულიან ოჯახს ხარაგაულის მუნიციპალიტეტის ადგილობრივმა ხელისუფლებამ საცხოვრებელი ფართი დაუქირავა.

სოციალურად დაუცველი ოჯახის საცხოვრებელი სახლი ავარიულ მდგომარეობაშია.

შენობის დაშლისა და ნგრევის პროცესი სამი წლის წინ დაიწყო. სახლი, რომლის ერთი მხარე დაჟანგებული რკინის ბოძებს უჭირავს, გადახრილია.

სამი თვის წინ იატაკი ჩავარდა და პატარა ბავშვი დიდი სიმაღლიდან ჩავარდა. ერთი თვის წინ ელენე პაქსაშვილის ფეხმძიმე რძალი ჩავარდა იატაკში და 5 თვის ნაყოფი დაიღუპა.

დანგრევის პირას მყოფი საცხოვრებელი სახლი 30 სექტემბერს მოსულმა უხვმა ნალექმა კიდევ უფრო დააზიანა.

„ხარაგაულის მუნიციპალიტეტის გამგეობამ გააფორმა ხელშეკრულება იმ სახლის მეპატრონესთან, სადაც საცხოვრებლად გადავედით და ბინის ქირას გამგეობა გადაგვიხდის,“ – ამბობს ელენე პაქსაშვილი.