დღეს, 20 მაისს, საქართველოს სკოლებში მეთორმეტე კლასელებისთვის ბოლო ზარი დაირეკა.

ხარაგაულის საგანმანათლებლო რესურსცენტრიდან მოპოვებული ინფორმაციით, მუნიციპალიტეტში მოქმედი 21 საშუალო სკოლა 139-მა მეთორმეტე კლასელმა დაამთავრა. მათგან 30 კურსდამთავრებული ოქროს, 2 კი – ვერცხლის მედლის მფლობელია.

ერთი კურსდამთავრებული ჰყავს ლაშის საჯარო სკოლას, ხოლო წყალაფორეთისა და ნადაბურის საჯარო სკოლებს – არც ერთი.

ამ წუთებში ხარაგაულის საკათედრო ტაძარში ხარაგაულის სკოლა-გიმნაზიის აღმასრულებელი დირექტორი დეკანოზი პავლე (ცერცვაძე) და ტაძრის მღვდელმსახური დეკანოზი თომა (ლაცაბიძე) კურსდამთავრებულებისთვის წირვას აღავლენენ. წირვის შემდეგ კი ახალგაზრდებს დალოცავენ.

ამის შემდეგ სკოლებში და ხარაგაულის კინოთეატრში საზეიმო ღონისძიება გაიმართება სკოლა-გიმნაზიის, ხარაგაულის #2 და ხარაგაულის #3 სკოლის მეთორმეტეკლასელების მონაწილეობით.

ვულოცავთ კურსდამთავრებულებს ცხოვრების ახალ ეტაპზე გასვლას. ბედნიერ და წარმატებულ მომავალს ვუსურვებთ.