ხარაგაულის კულტურის, ხელოვნებისა და შიდა ტურიზმის ცენტრი ინტელექტუალური თამაშების მოყვარულებს იწვევს ინტელექტუალურ თამაშში „რა? სად? როდის?” მონაწილეობისთვის.

თამაშები გაიმართება ხარაგაულის ცენტრალური ბიბლიოთეკის სამკითხველო დარბაზში.

შეჯიბრში მონაწილეობა შეუძლიათ ხარაგაულის მუნიციპალიტეტში მცხოვრებ პირებს, 16 წლის ასაკიდან.

ზამთრის სეზონს ითამაშებს ის ოთხი გუნდი, ვინც სხვებზე ადრე გამოთქვამს სურვილს და წარადგენს ექვსწევრიანი გუნდის განაცხადს.

  • თითოეული გუნდი ითამაშებს მრგვალ მაგიდასთან, ექვს მომგებიან ქულამდე.
  • სეზონის საუკეთესო შედეგის მქონე გუნდი ითამაშებს სეზონის ფინალში.
  • იმოქმედებს გადამწყვეტი რაუნდის პრინციპი იმ შემთხვევაში, თუ გუნდი იგებს, თუმცა ანგარიში არ არის საკმარისი ფინალში გასასვლელად.
  • ორი ერთნაირი შედეგის დაფიქსირების შემთხვევაში, უპირატესობა ენიჭება ბოლოს მოთამაშე გუნდს.
  • გუნდს, რომელიც თამაშის მსვლელობის დროს აგებს, ექნება ერთი დახმარება კლუბის წევრებისაგან. დახმარებისათვის განკუთვნილი დრო განისაზღვრება 20 წამით.
  • მოთამაშე გუნდის წევრები, ასევე კლუბის წევრები ყველა თამაშის ბოლოს ასახელებენ „დღის მოაზროვნეს“, რომელიც დაჯილდოვდება სპეციალური პრიზით.
  • კონკურსს ეყოლება წამყვანი და სარედაქციო კოლეგია.
  • პასუხის სისწორეზე გადაწყვეტილებას იღებს კონკურსის წამყვანი.
  • კონკურსის წამყვანთან კამათი შეჯიბრის მსვლელობის დროს დაუშვებელია.

სეზონის გამარჯვებული გუნდი დაჯილდოვდება ფულადი პრიზით და ფასიანი საჩუქრით.

ასევე გამოვლინდება „სეზონის მოაზროვნე“, რომელსაც გადაეცემა „ბროლის ბუ“.

დაინტერესებულმა გუნდებმა განაცხადი უნდა წარადგინოთ ხარაგაულის „კულტურის, ხელოვნებისა და შიდა ტურიზმის განვითარების ცენტრში”, არაუგვიანეს 12 თებერვლისა.

გუნდების თამაშების თანმიმდევრობა გაირკვევა კენჭისყრით.

თამაშები გაიმართება 16 და 23 თებერვალს, 9 და 16 მარტს, 18:00 სთ-ზე. სეზონის ფინალი ჩატარდება 23 მარტს.

დაწვრილებითი ინფორმაციისათვის დარეკეთ ტელეფონით – 577620280.

გისურვებთ წარმატებებს!