მასწავლებლის პროფესიული განვითარებისა და კარიერული წინსვლის სქემაში მნიშვნელოვანი ცვლილებები და სიახლეები შევიდა. შესაბამისი განკარგულება დღეს, 13 მარტს, გამოიცა.

აღნიშნული ცვლილებების შესაბამისად, მასწავლებლის სტატუსის მინიჭებისთვის სქემაში განსხვავებული პირობები განისაზღვრა. კერძოდ:

  • წამყვანი/მენტორის სტატუსის მინიჭება მოხდება უნარების გამოცდის შედეგებისა და პორტფოლიოს შეფასების საფუძველზე;
  • უფროს მასწავლებელს, რომელმაც უნარების გამოცდაში გადალახა მენტორის სტატუსის მისაღებად დაწესებული ზღვარი, საშუალება ეძლევა, პორტფოლიოს შეფასება წარმოადგინოს ან წამყვანობაზე ან მენტორობაზე;
  • დოქტორის აკადემიური ხარისხის მქონე პირები, რომელთაც უფროსი მასწავლებლის სტატუსი მოპოვებული აქვთ მინიმუმ 7 კრედიტზე დადასტურებული საგნის გამოცდით, ან ეროვნული სასწავლო გეგმით გათვალისწინებული საგნის/საგნობრივი ჯგუფის დოქტორობით, თავისუფლდებიან სტატუსის ასამაღლებელი უნარების გამოცდისგან და მხოლოდ პორტფოლიოს საფუძველზე შეფასდებიან.

მნიშვნელოვანი სიახლეებია სპეციალური მასწავლებლის კარიერული წინსვლის ხელშეწყობის კუთხით. კერძოდ, ცვლილებების შესაბამისად:

  • სპეციალური მასწავლებლის სტატუსების ჩამონათვალს დაემატა მენტორის სტატუსი;
  • შეიცვალა წამყვანი და მენტორი სპეციალური მასწავლებლის სტატუსის მოპოვების გზები – სტატუსის მოპოვება შესაძლებელი ხდება სპეციალური მასწავლებლობის მსურველების პროფესიული უნარების გამოცდის ჩაბარებისა და პორტფოლიოს შეფასების საფუძველზე;
  • წამყვანის სტატუსის მოსაპოვებელი გამოცდა გაიმართება 2023 წელს, ხოლო მენტორის – 2024 წლიდან დაიწყება.
  • სპეციალური მასწავლებლები, რომლებიც მუშაობენ ინტელექტუალური და და სწავლის დარღვევების, მრავლობითი და სენსორული დარღვევების მქონე მოსწავლეებთან, გაივლიან სპეციალურ სასერტიფიკატო კურსს.

შეფასებისა და გამოცდების ეროვნული ცენტრის ინფორმაციით, 2022 წლის ზაფხულზე წამყვანი პედაგოგის სტატუსის მოსაპოვებლად გამოცდაზე 8 102 მასწავლებელი გავიდა. მათგან გამოცდა 2 456-მა მასწავლებელმა ჩააბარა. მენტორის გამოცდას 2 744 მასწავლებელი აბარებდა, ბარიერი 184-მა პედაგოგმა გადალახა.

ამავე თემაზე დაგაინტერესებთ

„მეტი ფული უნდა დაიხარჯოს მასწავლებელთა მომზადებაზე, ვიდრე მათ შემოწმებაზე“