ხარაგაულის მუნიციპალიტეტში მოქმედი უსინათლოთა არაფორმალური განათლების პროგრამა განახლდა.

ამ პროგრამას, მერვე წელია, „ხარაგაულის კულტურის, ხელოვნებისა და შიდა ტურიზმის ცენტრი“ ახორციელებს. პროგრამა აპრილიდან ნოემბრის ჩათვლით გრძელდება.

2025 წელს, წინა წლებთან შედარებით, ამ პროგრამის ბიუჯეტი 5 ათასი ლარით გაიზარდა და 17 200 ლარი გახდა. ამ თანხიდან 17 ათასი ლარი 6 დასაქმებული პირის ხელფასებს მოხმარდება, 200 ლარი პროგრამის ფარგლებში დაგეგმილი სხვადასხვა ღონისძიებებისთვის გაიხარჯება.

წელს 8 უსინათლო გააგრძელებს ბრაილის შრიფტის, ადაპტირებული კომპიუტერული პროგრამების, სამაგიდო სპორტული თამაშებისა და აუდიო წიგნების პროგრამის შესწავლას.

ბრაილის შრიფტს მათ მზია კურტანიძე ასწავლის, ადაპტირებულ კომპიუტერულ პროგრამებს – ვასილ ლომიძე, სამაგიდო სპორტულ თამაშებს – რომან შავიძე, აუდიო წიგნების მოძიებას – თინათინ ცხრაკბილაშვილი. პროგრამის მენეჯერია გულიკო ჭარბაძე, ტექნიკური მენეჯერი – სერგო შველიძე.

უსინათლოები ყოველ ოთხშაბათს 09:30 საათიდან კულტურის ცენტრის შენობის სარეპეტიციო დარბაზში შეიკრიბებიან. მათი მეცადინეობები ორ საათს გაგრძელდება.

„უსინათლოები ორ ჯგუფად გავყავით, – ამბობს ადაპტირებული კომპიუტერული პროგრამების ხელმძღვანელი ვასილ ლომიძე, – ერთ კვირაში ერთი ჯგუფი მოვა, მეორე კვირაში – მეორე. ეს პროგრამა ძალიან მნიშვნელოვანია უსინათლოთა განათლებისა და მათი საზოგადოებაში ინტეგრაციისთვის. ამიტომ მეტი მხარდაჭერა გვჭირდება.

ვგეგმავთ, რომ ზემო იმერეთის სხვა მუნიციპალიტეტების უსინათლოთა გაერთიანებებს დავუკავშირდეთ და ხარაგაულში უსინათლოთა შორის ჭადრაკსა და შაშში სპორტული შეჯიბრებები მოვაწყოთ. ამ მოთხოვნით ხარაგაულის მუნიციპალიტეტის მერიას უნდა მივმართოთ. ვფიქრობთ, მხარს დაგვიჭერენ.

სამწუხაროდ, ხარაგაულის მუნიციპალიტეტში მცხოვრები ყველა უსინათლო ამ პროგრამაში ვერ ერთვება. წიფაში, უბისაში, მაქათუბანსა და ღორეშაში მცხოვრებ უსინათლოებს ხარაგაულამდე ტრანსპორტირება ძალიან უჭირთ.

ისინი დამოუკიდებლად ვერ მგზავრობენ, ოჯახის წევრი უნდა გამოყვეს. ეს კი ხარჯებთანაა დაკავშირებული. უსინათლოთა ტრანსპორტირების დაფინანსების საკითხზე ხარაგაულის მერს უნდა შევხვდე. ერთხელ და სამუდამოდ ეს პრობლემა უნდა გადაიჭრას.

მეორე წელია, ხარაგაულის მუნიციპალიტეტის ადგილობრივი ბიუჯეტიდან უსინათლოებს ყოველ თვეში 70-70 ლარი გვერიცხება.

ახლახან, ხარაგაულის მუნიციპალიტეტი, ამ პროგრამის დაფინანსების გამო, როგორც საუკეთესო პრაქტიკის მქონე მუნიციპალიტეტი, დაჯილდოვდა. ჩვენი პროგრამა შედეგიანია. თითქმის ყოველ წელს 8-10 უსინათლო ეუფლება ბრაილის შრიფტსა და ადაპტირებულ კომპიუტერულ პროგრამებს, ხმოვანი პროგრამით ეცნობა მხატვრულ ლიტერატურას. შესაძლოა, ჩვენთან მიღებული ცოდნით, დასაქმდნენ კიდეც.

ყველაზე მთავარია, რომ უსინათლოები გარეთ გამოვდივართ, ერთმანეთს ვხვდებით, ხან ექსკურსიებს ვაწყობთ და ხანაც ერთმანეთს დაბადების დღეებს ვულამაზებთ“.

პროგრამის მენეჯერი გულიკო ჭარბაძე ამბობს, რომ უსინათლოები პროგრამის განახლებას მოუთმენლად ელოდებოდნენ.

„კარგი იქნება, სოფლებიდან ხარაგაულში უსინათლოთა ტრანსპორტირება რომ დაფინანსდეს, – ამბობს გულიკო ჭარბაძე, – გასულ წელს ლეღვანში მცხოვრებ უსინათლოს 200 წიგნი ჩაუტვირთა ბატონმა ვასილმა ტელეფონში. ის ადამიანი ამით ძალიან ბედნიერია. ამ პროგრამის მონაწილე ყველა უსინათლომ ძალიან გაიხარა, როცა ლიტერატურული წრის ღონისძიება მოვაწყვეთ. მათ ერთმანეთთან ურთიერთობები აძლიერებთ“.

უსინათლოთა არაფორმალური განათლების ხელშეწყობის პროექტით, ხარაგაულის მუნიციპალიტეტმა, ახლახან, „საუკეთესო პრაქტიკის პროგრამის“ კონკურსში გაიმარჯვა. საქართველოს ადგილობრივ თვითმმართველობათა ეროვნულმა ასოციაციამ, ამ კონკურსის 11 ნომინაციაში, სულ 13 მუნიციპალიტეტი დააჯილდოვა.

ამავე თემაზე დაგაინტერესებთ

„უსინათლოებს დამოუკიდებლად ცხოვრებისთვის საჭირო უნარ-ჩვევები უნდა შევასწავლოთ“