საქართველოსა და გერმანიის მთავრობების თანამშრომლობის ფარგლებში, ხარაგაულის მუნიციპალიტეტში „სამოქალაქო ბიუჯეტირების პროგრამა“ ხორციელდება.

ამ პროგრამის ფარგლებში გამარჯვებული შვიდი პროექტისთვის საპროექტო-სახარჯთაღრიცხვო დოკუმენტაციის მოსამზადებლად 5 აპრილს ტენდერი განმეორებით გამოცხადდა.

18 მარტს, 4 950 ლარზე გამოცხადებულ ტენდერში მონაწილეობა არავინ მიიღო.

ამჯერად ტენდერი ხარჯთაღრიცხვის მოსამზადებლად 7 300 ლარზე გამოაცხადდა. ამ ტენდერში წინადადებების მიღება 15 აპრილს დასრულდება.

ხარაგაულის მუნიციპალიტეტში „სამოქალაქო ბიუჯეტირების პროგრამით“ იგეგმება:

  1. ხარაგაულის აღმნიშვნელი დეკორატიული აბრების მოწყობა (პროექტის ავტორია გივი კურტანიძე);
  2. „ჯანსაღი ცხოვრების წესი სოფლად“ – ვერტვიჭალაში მინიმოედნის მოწყობა (პროექის ავტორია კობა სხილაძე);
  3. „ხარაგაული ჩაიფიქრე“ – ხარაგაულის სერზე ტურისტული ლოკაციის მოწყობა (პროექტის ავტორია ზურაბ თაბუკაშვილი);
  4. „ლილეს წყაროს“ მოწყობა კიცხში (პროექტის ავტორია დეა ბერაძე);
  5. ხარაგაულში ფრენბურთის მოედნის მშენებლობა (პროექტის ავტორია დიმიტრი ჩიკვაიძე);
  6. ღორეშაში ხელოვნურსაფარიანი მინიმოედნის მოწყობა (პროექტის ავტორია ზაზა გლუნჩაძე);
  7. ფარცხნალში დევდარიანებისა და ლეჟავების უბანში წყლის ჭაბურღილის მოწყობა (პროექტის ავტორია გულნარა დევდარიანი).

ამ პროექტების განსახორციელებლად ხარაგაულის ბიუჯეტში 150 ათასი ლარია განსაზღვრული.

ამავე თემაზე დაგაინტერესებთ

ხარაგაულში „სამოქალაქო ბიუჯეტირების პროგრამით“ პროექტების განხორციელება აპრილიდან დაიწყება