ხარაგაულის მუნიციპალიტეტში მოქმედ 21 საბავშვო ბაღში სასწავლო-სააღმზრდელო პროცესი 6 ოქტომბერს განახლდება.

სექტემბრის დასაწყისში დაანონსდა, რომ სწავლა საბავშვო ბაღებში 4 ოქტომბერს დაიწყებოდა. რა გახდა სწავლის გადადების მიზეზი, – ამ შეკითხვით ხარაგაულის სკოლამდელ დაწესებულებათა გაერთიანების დირექტორს, მამუკა ჭიპაშვილს მივმართეთ.

მისი ინფორმაციით, საკვები პროდუქტების მომწოდებელმა, რომელიც ხარაგაულის გარდა, ოცი მუნიციპალიტეტის საბავშვო ბაღებს ამარაგებს, პროდუქტების მოწოდება 4 ოქტომბრისთვის ფიზიკურად ვერ შეძლო.

„ზესტაფონში, საბავშვო ბაღები სწავლას 11 ოქტომბრიდან იწყებენ. ჩვენ 6 ოქტომბრისთვის ყველაფერს ვასწრებთ და ვაგვარებთ“, – ამბობს მამუკა ჭიპაშვილი.

ხარაგაულის სკოლამდელ დაწესებულებათა გაერთიანებაში შემავალ საბავშვო ბაღებში 600-მდე აღსაზრდელია.