ცენტრალურ საარჩევნო კომისიაში (ცესკო) რეგისტრაციიდან მოხსნილმა, რეგისტრაცია ძალადაკარგულმა და მისამართის გარეშე რეგისტრირებულმა საქართველოს მოქალაქეებმა მიმდინარე წლის 11 სექტემბრის ჩათვლით სახელმწიფო სერვისების განვითარების სააგენტოს უნდა მიმართონ.

მათ უნდა მიუთითონ  ფაქტობრივი საცხოვრებელი ადგილი და ციფრულ ფორმატში გადაიღონ  ფოტოსურათი. წინააღმდეგ შემთხვევაში ისინი ვერ მოხვდებიან ამომრჩეველთა ერთიან სიაში და შესაბამისად არჩევნებში მონაწილეობას ვერ მიიღებენ. აღნიშნული პროცედურის გავლის შემდეგ ეს მოქალაქეები ისარგებლებენ გარკვეული შეღავათებით.

კანონმდებლობის მიხედვით, ამომრჩეველი, რომელსაც აქვს იურიდიული ძალის მქონე საქართველოს მოქალაქის პირადობის მოწმობა ან საქართველოს მოქალაქის პასპორტი და მოხსნილია საცხოვრებელი ადგილის მიხედვით რეგისტრაციიდან, ან მისი რეგისტრაცია ძალადაკარგულად გამოცხადდა, 2021 წლის 2 ოქტომბრის მუნიციპალიტეტის წარმომადგენლობითი ორგანოების არჩევნებისთვის ამომრჩეველთა ერთიან სიაში შედის ბოლო რეგისტრაციის ადგილის ან ფაქტობრივი საცხოვრებელი ადგილის მიხედვით.

მისამართის გარეშე რეგისტრირებულ ამომრჩევლებს რაც შეეხება, ისინი ამომრჩეველთა ერთიან სიაში შედიან სახელმწიფო სერვისების განვითარების სააგენტოს მონაცემთა ელექტრონულ ბაზაში არსებული ფაქტობრივი საცხოვრებელი ადგილის მიხედვით.

წყარო