სამხედრო სავალდებულო სამსახურში მოქალაქეთა 2021 წლის საგაზაფხულო გაწვევა პირველი თებერვლიდან დაიწყება და 30 ივნისამდე გაგრძელდება.

მთავრობის დადგენილებით, საქართველოს თავდაცვის ძალებში, სპეციალურ პენიტენციურ სამსახურში, საქართველოს შინაგან საქმეთა სამინისტროსა და სახელმწიფო დაცვის სპეციალურ სამსახურში გაიწვევენ 18-დან 27 წლამდე ასაკის მოქალაქეებს, რომლებსაც საქართველოს კანონმდებლობით გათვალისწინებული წესით არ აქვთ სამხედრო სამსახურში გაწვევის გადავადების ან სამხედრო სამსახურში გაწვევისაგან გათავისუფლების მოთხოვნის უფლება.

  • თავდაცვის ძალებში გასაწვევ მოქალაქეთა მაქსიმალური რაოდენობა 1400-ით განისაზღვრა;
  • სპეციალურ პენიტენციურ სამსახურში 585 მოქალაქეს გაიწვევენ;
  • შინაგან საქმეთა სამინისტროში – 1333 მოქალაქეს;
  • სახელმწიფო დაცვის სპეციალურ სამსახურში 150 ახალგაზრდას.

18-დან 27 წლამდე ასაკის გასაწვევი მოქალაქეები, ამ დადგენილების ამოქმედების დღიდან, ვალდებულნი არიან, გამოცხადდნენ მუნიციპალიტეტის მერიის, ხოლო ქალაქ თბილისის მუნიციპალიტეტში – ქალაქ თბილისის მუნიციპალიტეტის რაიონის გამგეობის და აფხაზეთის ავტონომიური რესპუბლიკის აფხაზეთის ავტონომიური რესპუბლიკიდან იძულებით გადაადგილებულ პირთა – დევნილთა სამინისტროს შესაბამის სტრუქტურულ ერთეულში რეგისტრაციის/ფაქტობრივი საცხოვრებელი ადგილის მიხედვით.

მთავრობის ეს დადგენილება 2021 წლის პირველი თებერვლიდან ამოქმედდება.