პარტია „ქართული ოცნება-დემოკრატიული საქართველოს“ თავმჯდომარე ბიძინა ივანიშვილი პოლიტიკას ტოვებს.

ის საზოგადოებას ღია წერილით მიმართავს.

როგორც წერილშია აღნიშნული, ის საბოლოოდ ტოვებს პარტიის თავმჯდომარის თანამდებობას და პოლიტიკას.

„ჩემს 2011 წლამდელ, კერძო ცხოვრების წესს ვუბრუნდები,“ – აღნიშნავს ბიძინა ივანიშვილი წერილში, – პოლიტიკიდან მივდივარ ამაყი, გამარჯვებული და ხალხის მადლიერი. ხალხმა შეძლო იმ ძალისხმევის დანახვა, რაც მხოლოდ და მხოლოდ ქვეყნისა და სახელმწიფოს ინტერესებიდან გამომდინარე გავწიე. დარწმუნებული ვარ, ქართველი ხალხი ასევე შეაფასებს ჩემს დღევანდელ ნაბიჯსაც, რომელიც იმავე ინტერესებითაა ნაკარნახევი, რისთვისაც მე პოლიტიკაში მოვედი“.

ღია წერილში ივანიშვილი 2011 წელს პოლიტიკაში მოსვლის მიზნებსა და ამოცანებზე საუბრობს, 2020 წლის საპარლამენტო არჩევნებს მიმოიხილავს და მას ისტორიული მნიშვნელობისას უწოდებს.

ივანიშვილი მიიჩნევს, რომ „წარმატების მიუხედავად, ჩვენი ქვეყნის მთავარ გამოწვევად და პრობლემად ჯერ კიდევ დაუძლეველი სიღარიბე რჩება“, თუმცა იქვე აღნიშნავს: „ვერ მივიღებ იმ ბრალდებას, რომ სიღარიბე, რომელიც მემკვიდრეობით გვერგო, „ქართული ოცნების“ მმართველობის შედეგია“.
წერილის დასასრულს ბიძინა ივანიშვილი მადლობას უხდის ქართველ ხალხს, საქართველოს სამოციქულო მართლმადიდებელ ეკლესიას, პოლიტიკურ გუნდს, ყველა თანამოაზრესა და თანამებრძოლს, საქართველოს მთავარ სტრატეგიულ მოკავშირეს – ამერიკის შეერთებულ შტატებს, ევროკავშირის ქვეყნებს და საკუთარ ოჯახს.