ამ დრომდე „საქართველოს რკინიგზას“ „მასტერაოთი“ მგზავრები ვერ გადაჰყავს.

ეს საგარეუბნო მატარებელი ჯანდაცვის სამინისტროსგან დადგენილ რეკომენდაციებს ვერ აკმაყოფილებს.

ხაშური-ხარაგაული-ზესტაფონის საგარეუბნო მატარებელი ჩხერიმელას ხეობის მოსახლეობისთვის ერთადერთი ხელსაყრელი ტრანსპორტია.

ხარაგაულის მერიიდან მოპოვებული ინფორმაციით, მერიის სარეზერვო ფონდიდან 2 ათასი ლარი გამოიყო, რომ მოქალაქეებმა ჩხერიმელას ხეობის სოფლებიდან ხარაგაულში, ზესტაფონსა და ხაშურში გადაადგილება მიკროავტობუსებით შეძლონ.

მიკროვტობუსები შემდეგი მიმართულებით იმოძრავებს:

  • ვახანი-ხარაგაული, ვახანი-ზესტაფონი, ვახანი-მოლითი-წიფა-ხაშური;
  • მოლითი-ხაშური, მოლითი-ბაბი-ქვები-ზესტაფონი;
  • წიფა-ხაშური;
  • ნუნისი-ზვარე-ხაშური, ნუნისი-ზვარე-ხარაგაული.

მერია შესყიდვების სააგენტოდან თანხმობას ელოდება, რომ მუნიციპალიტეტმა სოკარის ან რომპეტროლის ავტოგასამართი სადგურებიდან 2 ათასი ლარის საწვავის ტალონები შეისყიდოს. საწვავის ტალონებს მერის წარმომადგენლები მიკროავტობუსების მძღოლებს გადასცემენ.

მოსახლეობისთვის მგზავრობა უფასო არ იქნება. როგორც მერიის ჯანდაცვისა და სოციალური სამსახურის უფროსი ნანა კიკნაძე ამბობს, მგზავრები დღეს მოქმედი ტარიფის ნახევარს გადაიხდიან.

ნინო კაპანაძე

ფოტოზე: მოლითის რკინიგზის სადგური