რეგიონული განვითარების ფონდიდან ხარაგაულის მუნიციპალიტეტს ოთხი ამბულატორიის რემონტისთვის 104 ათასი ლარი გამოეყო.

მერიის კეთილმოწყობისა და ინფრასტრუქტურის სამსახურის უფროსის, თემურ თაბუკაშვილის ინფორმაციით, საექიმო ამბულატორიები ხიდარში, წყალაფორეთში, ვახანსა და ფარცხნალში გარემონტდება. მისივე თქმით, ხარაგაულის მუნიციპალიტეტში მოქმედი ყველა ამბულატორიის მდგომარეობის შესახებ ინფორმაცია იმერეთის სამხარეო ადმინისტრაციაში, ინფრასტრუქტურისა და რეგიონული განვითარების სამინისტროში წარადგინეს. ამ ორი უწყების ჯანდაცვის სამინისტროსთან რეკომენდაციით კი ოთხი ამბულატორია შეირჩა. ხარაგაულის მუნიციპალიტეტის მერიამ ეს თანხა თითოეულ ამბულატორიაზე თანაბრად გაანაწილა (26-26 ათასი ლარი).

თემურ თაბუკაშვილის ინფორმაციით, საპროექტო-სახარჯთაღრიცხვო დოკუმენტაციას ი/მ „ავთანდილ მესხი“ მერიას ივნისში ჩააბარებს.

ვახანში, ფარცხნალსა და ხიდარში ამბულატორიები ადმინისტრაციულ შენობებშია განთავსებული. წყალაფორეთში საექიმო ამბულატორია 2006 წელს მსოფლიო ბანკის დაფინანსებით აშენდა. ამბულატორიები კაპიტალურად გარემონტდება, წყალმომარაგება აღუდგება  და სახანძრო უსაფრთხოების ჰიდრატები დაყენდება.

ფოტოზე: წყალაფორეთის ამბულატორიის ერთ-ერთი ოთახი