სტუდენტობა ადამიანის ცხოვრების ერთ-ერთი უმშვენიერესი ხანაა. სტუდენტობას წინ აბიტურიენტობის რთული პერიოდი უძღვის. თუმცა, გამოცდების წარმატებით ჩაბარებისას ყველა სიძნელე გავიწყდება და მომავალს ახალი გეგმებით გასცქერი.

ვერტყვიჭალის საჯარო სკოლის კურსდამთავრებულ სოსო გოგოლაძეს ბავშვობის ოცნება აუხდა და თბილისის სახელმწიფო სამედიცინო უნივერსიტეტის სტუდენტი გახდა. მან 100%-იანი საგრანტო დაფინანსება მოიპოვა. სოსო თვლის, რომ მისი წარმატება მონდომების დამსახურებაა.

ზოგიერთ საგანში უკეთესი შედეგი სურდა, თუმცა შედეგით კმაყოფილია. სოსო ყოველდღიურად ინტენსიურად მეცადინეობდა და თავისი შესაძლებლობების მაქსიმუმს აკეთებდა. გამოცდების შედეგები რომ გამოცხადდა, ხაშურში იმყოფებოდა. ეს დიდი წარმატება პირველად დედას ახარა.

70%-იანი გრანტი მოიპოვა ხარაგაულის #2 საჯარო სკოლის კურსდამთავრებულმა ბერიკა ებანოიძემ და საქართველოს აგრარული უნივერსიტეტის ბიზნესის ადმინისტრირების ფაკულტეტის სტუდენტი გახდა. ბერიკასა და მის თანაკლასელებს აგრარული უნივერსიტეტის წარმომადგენლები სკოლაში ეწვიენ და ურჩიეს მომავალი პროფესიის სწორედ ამ უმაღლეს სასწავლებელში დაუფლება. ბერიკამ იცოდა, რომ სასურველ ფაკულტეტზე მოხვედრას მაღალი ქულები სჭირდებოდა, ამიტომ მათემატიკისა და გეოგრაფიის დამატებითი გამოცდები ჩააბარა.

ბერიკა ებანოიძე მიიჩნევს, რომ ხარაგაულში არის იმის შესაძლებლობა, რომ ახალგაზრდამ კარგი განათლება მიიღოს და საქართველოს ნებისმიერ უმაღლეს სასწავლებელში ჩააბაროს. ბერიკა და მისი მეგობრები ქობულეთიდან ბრუნდებოდნენ, როდესაც გამოცდების შედეგები გაიგეს. გახარებული ახალგაზრდების ოვაციები დიდხანს არ წყდებოდა თურმე.

ხევის საჯარო სკოლის კურსდამთავრებულმა საბა გრიგალაშვილმა მომავალ პროფესიად სოციალურ-პოლიტიკურ მეცნიერებათა ფაკულტეტი აირჩია და 70%-იანი საგრანტო დაფინანსებით თბილისის სახელმწიფო უნივერსიტეტის სტუდენტი გახდა.

საბას საზოგადოებასთან ურთიერთობა ძალიან უყვარს, თანაც ფიქრობს, რომ  ქართულ პოლიტიკაში კვალიფიციური კადრების სიმცირეა. სწორედ ამან განაპირობა მისი პროფესიული არჩევანი. საბას აზრით,  პედაგოგები მოსწავლის მომავლის ფორმირებაში უდიდეს როლს თამაშობენ – ისინი აძლევენ ახალგაზრდებს საბაზისო ცოდნას, რომელიც გამოცდებზე მათი წარმატების საწინდარია. საბას აზრით, მისი მაღალი შედეგი, შრომისმოყვარეობასთან ერთად, პედაგოგების დამსახურებაა.

გამოცდების შედეგები სახლში, ოჯახის წევრების გარემოცვაში შეიტყო. ემოციები იმდენად დიდი იყო, რომ მისი სიხარულის გამომხატველი ყიჟინა მეზობლებმაც გაიგეს.

ხარაგაულის მუნიციპალიტეტში მოქმედი სკოლების წლევანდელი 190 კურსდამთავრებულიდან 94 უმაღლესი სასწავლებლის სტუდენტი გახდა.

წელს 50%-იანი გრანტი მოიპოვა თორმეტმა ხარაგაულელმა პირველკურსელმა:

  • კესო შარიქაძემ (ხარაგაულის #2 სკოლა, თბილისის სახელმწიფო უნივერსიტეტის ფსიქოლოგიის ფაკულტეტი);
  • ვანო გვაძაბიამ (ხარაგაულის გიმნაზია, თბილისის სახელმწიფო უნივერსიტეტის ეკონომიკის ფაკულტეტი);
  • მეგი მიქაბერიძემ (ხარაგაულის გიმნაზია, თბილისის სახელმწიფო უნივერსიტეტის ფილოლოგიის ფაკულტეტი);
  • ნინო გელაშვილმა (ხარაგაულის გიმნაზია, ილიას სახელმწიფო უნივერსიტეტის მეცნიერებისა და ხელოვნების ფაკულტეტი);
  • ნინო რამიშვილმა (ხარაგაულის გიმნაზია, ილიას სახელმწიფო უნივერსიტეტის მეცნიერებისა და ხელოვნების ფაკელტეტი);
  • ანა მაღრაძემ (ვახანის სკოლა, სანდიეგოს უნივერსიტეტის კომპიუტერული მეცნიერებების ფაკულტეტი);
    ლაშა ლურსმანაშვილმა (ვერტყვიჭალის სკოლა, თბილისის ტექნიკური უნივერსიტეტის მათემატიკის ფაკულტეტი);
  • რომა გრიგალაშვილმა (ხევის სკოლა, თბილისის სახელმწიფო უნივერსიტეტის კომპიუტერული მეცნიერებების ფაკულტეტი);
  • ხატია ტაბატაძემ (ხევის სკოლა, ილიას სახელმწიფო უნივერსიტეტის ჰუმანიტარული მეცნიერებების ფაკულტეტი);
  • ოლეგ ჩაჩანიძემ (კიცხის სკოლა, დავით აღმაშენებლის სახელობის უნივერსიტეტის სამედიცინო ფაკულტეტი);
  • ამანდა ხვედელიძემ (#3 სკოლა, თბილისის სახელმწიფო უნივერსიტეტის ფსიქოლოგიის ფაკულტეტი);
  • ლუკა თაბუკაშვილმა (#3 სკოლა, თბილისის სახელმწიფო უნივერსიტეტის სამართალმცოდნეობის ფაკულტეტი).

ხარაგაულელი პირველკურსელებიდან უფასო სწავლების სპეციალობაზე 22 ახალგაზრდა ჩაირიცხა.

ყველა პირველკურსელს სტუდენტობას ვულოცავთ და წარმატებულ სწავლას ვუსურვებთ.

თამთა გოგოლაძე