ხარაგაულის მუნიციპალიტეტის საკრებულომ პირველი ოქტომბრის სხდომაზე მერიის ეკონომიკისა და ქონების მართვის სამსახურის საქმიანობა დადებითად შეაფასა.

დეპუტატებს 2017 წელს და 2018 წლის 8 თვეში გაწეული მუშაობის შესახებ ანგარიში სამსახურის უფროსმა ჯაბა ბერაძემ წარუდგინა.

სხდომაზე მყოფი 30 დეპუტატიდან მერიის სამსახურის საქმიანობა უარყოფითად საკრებულოს საფინანსო-საბიუჯეტო კომისიის თავმჯდომარე ვარლამ ჭიპაშვილმა შეაფასა. მან საამისოდ რამდენიმე არგუმენტი მოიყვანა:

სამსახურის არასათანადო კომუნიკაცია მერიის სხვა სამსახურებთან და საკრებულოს საფინანსო-საბიუჯეტო კომისიასთან. კერძოდ, 2018 წლის ბიუჯეტის დაგეგმვისას მერიის ეკონომიკისა და ქონების მართვის სამსახურს საკრებულოსთვის არ წარუდგენია წერილობითი ანალიზი, რამდენად შესაძლებელი იქნებოდა პრივატიზაციიდან 70 ათასი ლარის, ხოლო ბუნებრივი რესურსებით სარგებლობის მოსაკრებლიდან 100 ათასი ლარის მიღება;

ეკონომიკისა და ქონების მართვის სამსახური ვერ უვლის მუნიციპალურ ქონებას. კერძოდ,

  • საბიუჯეტო სახსრებით შეძენილი მუნიციპალური ქონებები, მაგალითად, წისქვილის ძრავები, არავისზე არ არის მიბარებული. შესაბამისად, არსებობს ამ ქონებების განადგურების რისკი;
  • შპს „ხარაგაულის 2011“-ის ქონების ნაწილი სად არის, უცნობია;
  • არ არის განსაზღვრული მუნიციპალიტეტის მერიისა და საკრებულოს ავტომანქანებზე პასუხისმგებელი პირები;
  • ქონების მართვისა და ინფრასტრუქტურის სამსახურს საკრებულოში არ წარუდგენია მუნიციპალიტეტის ეკონომიკური განვითარების ხედვა ან სხვა რაიმე პროექტი, რომელიც გრძელვადიანი პერსპექტივისა და მატერიალური დოვლათის შექმნაზე იქნება ორიენტირებული;
  • სამსახურს ამ დრომდე არაფერი გაუკეთებია, რომ ყოფილი თანამდებობის პირებს საბიუჯეტო სახსრებით შეძენილი ტელეფონები და ლეპტოპები უკან დაებრუნებიათ;
  • ეკონომიკისა და ქონების მართვის სამსახური არ აქტიურობს, რომ მეწარმე სუბიექტებთან ქონების სარგებლობის უფლებით გაფორმებული ხელშეკრულებები შესრულდეს, კერძოდ, ერთ მეწარმეს შვიდი თვის თანხა აქვს გადასახდელი;
  • ინვენტარიზაციის მეორე ეტაპი – მუნიციპალიტეტისთვის გამოუყენებელი ქონების ჩამოწერა-განადგურება არ განხორციელებულა;
  • ე. წ. ღია ესტრადის მოვლა-პატრონობა მერიის მხრიდან შესასვლელ კარებზე ბოქლომის დადებით ამოიწურა. მუნიციპალური ქონება განადგურდა და ღია ესტრადის მოვლა-პატრონობის გეგმა არ გვაქვს.

ფრაქცია „თვითმმართველობა ხალხისთვის“ თავმჯდომარე ინგა მაღრაძე თვლის, რომ მუნიციპალიტეტის მერიის სხვა სამსახურების მუშაობის ფონზე ეკონომიკისა და ქონების მართვის სამსახურის საქმიანობა სავსებით დამაკმაყოფილებელია.

„საკრებულოს უმრავლესობა ვარლამ ჭიპაშვილის გამოთქმულ მოსაზრებას ეთანხმება, – აღნიშნა საკრებულოს სხდომაზე ფრაქცია „ქართული ოცნება-დემოკრატიული საქართველოს“ თავმჯდომარე პაატა გოგოლაძემ, – უმრავლეობა ასევე პიროვნულად კეთილგანწყობილია ჯაბა ბერაძის მიმართ. გადავწყვიტეთ, რომ მერიის ეკონომიკისა და ქონების მართვის სამსახურის საქმიანობა ამჯერად დადებითად შევაფასოთ, ვარლამის მიერ დასაბუთებული შენიშვნებისა და ხარვეზების გამოსწორების იმედით.“

დეპუტატებმა მერიის ეკონომიკისა და ქონების მართვის სამსახურის საქმიანობის განმეორებითი განხილვა 2019 წლის აპრილში დაგეგმეს.

ნინო კაპანაძე