ხარაგაულის მუნიციპალიტეტში მუნიციპალური ააიპ-ების შეერთების პროცესი მიმდინარეობს.

მერიის ადმინისტრაციის სამსახურის იურიდიული განყოფილების უფროსის, ინგა ლურსმანაშვილისგან მოპოვებული ინფორმაციით, შემოსავლების სამსახურსა და საჯარო რეესტრს, ჯერჯერობით, ხარვეზი არ დაუდგენიათ ააიპ-ებში კრედიტორული ან სხვა სახის დავალიანების შესახებ წარდგენილ დოკუმენტებში.

„ამჟამად ვმუშაობთ ააიპ-ების წესდებებზე, – ამბობს ინგა ლურსმანაშვილი, – სავარაუდოდ, 29 მარტიდან გაერთიანებული ააიპ-ების დირექტორები დაინიშნებიან, რომლებიც საჯარო რეესტრში ახალ წესდებებს წარადგენენ და ახალ საშტატო ნუსხას დაამტკიცებენ.“

ჩვენთვის ცნობილი გახდა, რომ სკოლამდელ დაწესებულებათა გაერთიანება, შესაძლოა, ააიპ-ების შეერთების პროცესს გამოეთიშოს. ამის მიზეზი „ადრეული და სკოლამდელი აღზრდისა და განათლების შესახებ“ კანონის ამოქმედებაა. კანონის თანახმად, გაერთიანებაში შემავალი ყველა საბავშვო ბაღი ცალ-ცალკე ააიპ-ებად უნდა ჩამოყალიბდნენ.

მერიის იურიდიული განყოფილების უფროსი ამბობს, რომ მისთვის ეს საკითხი ცნობილია, თუმცა სკოლამდელ დაწესებულებათა გაერთიანება ააიპ-ების შეერთების პროცესის მიღმა დარჩება თუ არა, ჯერ გადაწყვეტილი არ არის.

„მაგ საკითხზე მიმდინარეობს კონსულტაციები, ტრენინგები და შეხვედრები, – ამბობს ინგა ლურსმანაშვილი, – ალბათ უახლოეს ხანში ჩამოყალიბდებიან. კანონით, საბავშვო ბაღები ცალ-ცალკე ააიპ-ებად უნდა ჩამოყალიბდნენ, მაგრამ უნდა განისაზღვროს, რამდენად საკმარისი იქნება ამისთვის საბიუჯეტო სახსრები.“

შეგახსენებთ, რომ ხარაგაულის მუნიციპალიტეტის მერია შემდეგი ააიპ-ების გაერთიანებას გეგმავს:

  • სკოლამდელ დაწესებულებათა გაერთიანება, სამუსიკო სკოლა და მოსწავლე-ახალგაზრდობის სახლი;
  • „ხარაგაულკეთილმოწყობა“ და „ხარაგაულდასუფთავება“;
  • ისტორიული მუზეუმი, ცენტრალური ბიბლიოთეკა, კულტურის ცენტრი, ლიტერატურული თეატრი და ხალხური შემოქმედების სახლი;
  • ხარაგაულის სპორტის განვითარებისა და მართვის მუნიციპალური ცენტრი, საფეხბურთო კლუბი „ჩხერიმელა 2009“ და „ხარაგაულის მუნიციპალიტეტის განვითარებისა და შიდა ტურიზმის ხელშეწყობის ცენტრი“.