ხარაგაულის ოთარ აბაშიძის სახელობის სახალხო თეატრმა ლატვიის ქალაქ ლიმბაჟის საერთაშორისო ფესტივალის ორგანიზატორებისგან საჩუქარი მიიღო.

„საოცარი საჩუქარი მივიღე დღეს ჩვენი ლატვიელი მეგობრებისგან, – ამბობს თეატრის რეჟისორი ირინე ჩხეიძე, – ჩვენი სპექტაკლის, „დარისპანის გასაჭირის“ ჩანაწერი დისკებზე, ფესტივალის მსვლელობა და სიყვარულით სავსე წერილი.
ლიმბაჟის თეატრის მსახიობი იურის ბებრისში გვწერს: „ვფიქრობთ, ეს კადრები გაგახსენებთ კარგ მოგონებებს იმაზე, რაც ნახეთ ლიმბაჟში. ვუსურვებთ წარმატებებს თქვენს თეატრს და მსახიობებს.“

ხარაგაულის სახალხო თეატრი 2017 წლის 3-8 ივლისს ლიმბაჟში, საერთაშორისო თეატრალურ ფესტივალში – „თამაშები სიამოვნებისთვის“ – ლატვიის, ლიტვის, ესტონეთის, უკრაინისა და დანიის თეატრებთან ერთად მონაწილეობდა.

ხარაგაულის სახალხო თეატრი ლიმბაჟის თეატრალურ ფესტივალში წელს მესამედ მიიწვიეს, – პირველად – 1990 წელს, მეორედ – 2015 წელს.