ოთარ აბაშიძის სახელობის ხარაგაულის სახალხო თეატრი ამაღამ ლატვიაში, საერთაშორისო ფესტივალზე, მიემგზავრება.

ფესტივალი, რომელშიც რვა ქვეყნის თეატრალური დასები მონაწილეობენ, ადგილობრივი თეატრებისთვის 3 ივლისს დაიწყო და 8 ივლისამდე გაგრძელდება.

ხარაგაულის სახალხო თეატრი ფესტივალს 5 ივლისს სპეტაკლით „დარისპანის“ გასაჭირი“ (რეჟისორი ირინე ჩხეიძე) შეუერთდება.

საერთაშორისო თეატრალურ ფესტივალზე 28 სპექტაკლი იქნება წარდგენილი. მიუხედავად იმისა, რომ ფესტივალს კონკურსის სახე არ აქვს, თითოეულ სპექტაკლს, დასთან ერთად, შეაფასებენ და განიხილავენ ევროპის ქვეყნებიდან მოწვეული ექსპერტები.

როგორც აფიშა გვამცნობს, ფესტივალს ხარაგაულის სახალხო თეატრი დახურავს.

„ჩვენი მგზავრობა „საქართველოს რკინიგზამ“ დააფინანსა, რაც, გარკვეულწილად, სიმბოლურია. ხარაგაულის თეატრის პირველი დასის ადგილსამყოფელი, გასული საუკუნის დასაწყისში, რკინიგზელთა კლუბი იყო. ამიტომაც ვთხოვეთ დახმარება „საქართველოს რკინიგზას“ და ამ საქმეში ხარაგაულის გამგებელმა გვიშუამდგომლა, – ამბობს რეჟისორი ირინე ჩხეიძე.

მშვიდობიან მგზავრობას და ფესტივალში წარმატებულ მონაწილეობას ვუსურვებთ ხარაგაულის სახალხო თეატრის დასს.

ლაურა გოგოლაძე