ხარაგაულის მუნიციპალიტეტის დეპუტატმა ქეთევან ზუმბაძემ 5 ივნისს საკრებულოს სხდომაზე სასამართლოს გადაწყვეტილება წარადგინა.

ამ გადაწყვეტილების მიხედვით, ბორითში გამგებლის წარმომადგენელი ვლადიმერ ბარბაქაძე და შტატგარეშე თანაშრომელი მალხაზ სებისკვერაძე სისხლის სამართლის დამნაშავეებად არიან ცნობილები.

2016 წლის 9 ოქტომბერს ნასვამ მდგომარეობაში მყოფი ვლადიმერ ბარბაქაძე და მალხაზ სებისკვერაძე, „ქართული ოცნების“ აქტივისტებთან ერთად, თავს დაესხნენ უბისაში მცხოვრები დავით მახათაძის ოჯახს და ფიზიკურად გაუსწორდნენ მისი ოჯახის წევრებს.

დავით მახათაძე 2016 წლის საპარლამენტო არჩევნებზე საარჩევნო კომისიის წევრი იყო „ერთიანი ნაციონალური მოძრაობიდან“.

„ერთიანი ნაციონალური მოძრაობის“ ხარაგაულის რაიონულმა ორგანიზაციამ ამ საკითხზე გაზეთში „ჩემი იმერეთი“ სტატია გამოაქვეყნა.

დეპუტატმა ქეთევან ზუმბაძემ საკრებულოს სხდომაზე ხარაგაულის გამგებელს მოუწოდა, რომ დამნაშავეებად ცნობილი საჯარო მოხელეები დაუყოვნებლივ გაეთავისუფლებინა.

ხარაგაულის მუნიციპალიტეტის გამგეობის ადმინისტრაციული სამსახურის უფროსის, კახა გოლუბიანის ინფორმაციით, 7 ივნისს ვლადიმერ ბარბაქაძე და მალხაზ სებისკვერაძე გამგებელმა, პირადი განცხადებების საფუძველზე, თანამდებობებიდან გაათავისუფლა.

ნინო კაპანაძე