ხარაგაულის მუნიციპალიტეტის მოსწავლე-ახალგაზრდობის სახლმა(დირექტორი ნიკო მაჭავარიანი) ბავშვთა დაცვის საერთაშორისო დღისადმი მიძღვნილი ტრადიციული კონცერტი გამართა.

ღონისძიებაზე სიმღერები და ლიტერატურული კომპოზიციები შესრულდა. ხარაგაულის კინოთეატრში შეკრებილი მაყურებლის წინაშე წარსდგნენ:

  • ლიტერატურული თეატრის წრის მოსწავლეები (ხელმძღვანელი ლალი შარაშიძე),
  • საესტრადო წრის მოსწავლეები (ხელმძღვანელი დარეჯან გვაძაბია),
  • ბორის, ლეღვანისა და მარელისის სკოლებთან არსებული ხალხური სიმღერისა და საკრავების შემსწავლელი წრის მოსწავლეები (ხელმძღვანელები რეზო შარიქაძე, ირინა შარიქაძე),
  • საგალობლების წრის მოსწავლეები (რეგენტი თორნიკე ბაკურაძე).

„იმერული პოპური“ შეასრულეს მოსწავლეთა სახლის დირექტორმა და მასწავლებლებმა  – ნიკო მაჭავარიანმა, თორნიკე ბაკურაძემ, მაკა გელაშვილმა და მზია კუპრაძემ.

„მშობლებს, პედაგოგებსა და მთელ საზოგადოებას გვევალება, რომ თითოეული ბავშვი იყოს დაცული, განათლებული და უსაზღვროდ ბედნიერი, – აღნიშნა ღონისძიების წამყვანმა ლალი შარაშიძემ, – გავურთხლიდეთ ბავშვებს და მათ გულწრფელ სულებს დღეს, რომ ხვალინდელი სამყარო ჯანსაღი გვქონდეს“.

კონცერტის შემდეგ ღონისძიების მონაწილე და კინოთეატრის დარბაზში მყოფი ყველა ბავშვი ნაყინით დასაჩუქრდა.