„საქართველოს რკინიგზის“ ინფორმაციით, 2025 წლის 11 თებერვლიდან თბილისი-ოზურგეთი-თბილისის მიმართულებით სწრაფი და კომფორტული ელექტრომატარებელი (№854/853) იმოძრავებს.

სამგზავრო მატარებლის ტევადობა დაახლოებით 100 ადგილით გაიზრდება და მგზავრობის ხანგძლივობა თითქმის 2 საათით შემცირდება.

თბილისი-ოზურგეთი-თბილისის მატარებელი რეისებს დღეგამოშვებით შეასრულებს. კერძოდ, თბილისიდან გავა 09:00-ზე და ოზურგეთში ჩავა 16:18-ზე, ხოლო ოზურგეთიდან 08:40-ზე დაიძრება და თბილისში 16:00-ზე ჩამოვა.

აღნიშნულ მიმართულებაზე მეორე კლასის ბილეთის ღირებულება 11-15 ლარი იქნება. მატარებლის ბილეთების შეძენა შეგიძლიათ საქართველოს რკინიგზის სალაროებსა და gr.com.ge ვებგვერდზე ონლაინ.

ცვლილებაა თბილისი-ქუთაისის მიმართულებაზე – ქუთაისში მიმავალი მგზავრები ოზურგეთის მიმართულებით მოძრავი მატარებლით რიონის სადგურამდე იმგზავრებენ, ხოლო რიონის სადგურიდან ქუთაისი 1-ის სადგურამდე იმგზავრებენ №6355/6356 და №6353/6354 ელექტრომატარებლებით, რომელთა გრაფიკი მორგებულია თბილისი-ოზურგეთი-თბილისის მატარებლის განრიგს.

უფრო კონკრეტულად, ქუთაისში მიმავალი მგზავრები თბილისი-ოზურგეთის მატარებლით ჩავლენ ქუთაისში, რიონის სადგურამდე, ხოლო იმ მგზავრებს ვისაც ქუთაისი 1 სადგურამდე მისვლა სურთ, რიონში გადასხდებიან ელექტრომატარბელებში (№6355/6356 და №6353/6354 ). ამ მატარებელზე (რიონი-ქუთაისი 1) მგზავრობის საფასური 0,50 თეთრი იქნება.