გლობალური დათბობის პირობებში იზრდება სხვადასხვა ზოონოზური (ადამიანისა და ცხოველის საერთო დაავადება) და არაზოონოზური დაავადებების გავრცელების რისკი. ეს საფრთხეს უქმნის როგორც ცხოველის, ასევე ადამიანის ჯანმრთელობას.

დაავადებების გავრცელება, შესაძლოა, გამოიწვიოს ცხოველის არასწორმა და არასათანადო მოვლა-პატრონობამ, ზოოჰიგიენური ნორმების უგულვებელყოფამ, დაავადებების არასწორმა მკურნალობამ, ცხოველის ჯამრთელობის დასაცავად შესაბამისი ზომების დაუცველობამ. დაავადებებს ასევე იწვევს კანონით გათვალისწინებული ვაქცინაციებისა და პერიოდული შემოწმებების გამოტოვება.

არსებობს ისეთი დაავადებები, რომლებიც შესაძლებელია ადამიანს გადაედოს როგორც უშუალოდ ცხოველისგან, ასევე დაავადებული ცხოველისგან მიღებული პროდუქტებით. ასეთებია მაგალითად, ბრუცელოზი, ჯილეხი, ტრიქინელოზი და სხვ. ამ დაავადებების თავიდან ასაცილებლად აუცილებელია, რომ დაავადებული ცხოველისგან მიღებული პროდუქცია ექსპლოატაციიდან ამოიღონ სანიტარულ-ჰიგიენური ნორმებისა და სურსათის უვნებლობის შესაბამისი კანონმდებლობით გათვალისწინებული აქტების  დაცვით.

დაავადების გადამტანია მწერები და პარაზიტები, რომლებიც მრავლადაა ისეთ ფერმებსა თუ საოჯახო მეურნეობებში, სადაც ნაკლებადაა დაცული ზოოჰიგიენური სტანდარტი. ამის თავიდან ასაცილებლად ფერმერი უნდა იცავდეს ყველა იმ სტანდარტს, რაც საჭიროა ცხოველის სწორი ექსპლოატაციისა და მისი ჯანმრთელობის დაცვისათვის. მნიშვნელოვანია ცხოველების დამუშავება როგორც შიდა, ასევე გარე პარაზიტებზე, – მსხვილფეხა რქოსანში 3-4 თვეში ერთხელ, ღორში – 6 თვეში ერთხელ. აქვე აღსანიშნავია, რომ შიდა პარაზიტებზე დამუშავებისთვის შერჩეული პრეპარატი უნდა შეესაბამებოდეს ცხოველის ფიზიოლოგიურ მდგომარეობას, იგულისხმება მაკეობის პერიოდი. ამ დროს ყველა მედიკამენტის გამოყენება არ შეიძლება.

კანონის შესაბამისად, ცხოველი წელიწადში ორჯერ ბრუცელოზზე უნდა გამოვიკვლიოთ. აუცილებელია თურქულის, ჯილეხის და სხვა დაავადებების საწინააღმდეგოდ კანონმდებლობით გათვალისწინებული ვაქცინაციის ჩატარება.

დაავადებების თავიდან ასაცილებლად მნიშვნელოვანია ცხოველების ჯანსაღი და სწორი კვება, ტემპერატურული რეჟიმების დაცვა სადგომსა და საძოვარზე, მერძეული მიმართულების ფერმებში თვეში ორჯერ ფარულ მასტიტებზე შემოწმება.

ცხოველისგან მიღებული პროდუქცია სწორად უნდა გადამუშავდეს და შეინახოს, რათა ის არ დაბინძურდეს. გვახსოვდეს, ჯანსაღი ცხოველი ჯანსაღი პროდუქციის საწინდარია. ეს კი ჩვენს ჯამრთელობასა და სიცოცხლის ხანგრძლივობაზე პირდაპირ გავლენას ახდენს.

საშიკო ხიჯაკაძე
ფერმერი