სოციოლოგი იაგო კაჭკაჭიშვილი სოციალურ ქსელში პოსტს აქვეყნებს:

ხელისუფლებაში დარჩენა სურს პოლიტიკურ ძალას, რომლის 12-წლიანი მმართველობის შემდეგ ასეთი ვითარებაა:

  1. პენსია არის თვეში 315 ლარი (ანუ, 4 ადამიანის ზომიერი სადილი ერთხელ რესტორანში).
  2. ხუთსულიანი ოჯახი ღარიბად არ ჩაითვლება და ვერ მიიღებს სოციალურ დახმარებას, თუ თვეში აქვს 378 ლარი (ანუ, 5 ადამიანის ზომიერი სადილი ერთხელ რესტორანში).
  3. სახელმწიფო, ოფიციალურად, დაახლოებით 700 000 ადამიანს აღიარებს ღარიბად, ანუ თავისთავად არაადეკვატური საარსებო მინიმუმის არმქონედ. ეს საქართველოს რეალური მოსახლეობის დაახლოებით მეოთხედია.
  4. სოციალური დახმარების ოდენობა 1 სულზე არის მაქსიმუმ თვეში 60 (!) ლარი (ანუ, ერთი ადამიანის ზომიერი სადილი რესტორანში).
  5. მინიმალურ ხელფასად თვეში განსაზღვრულია 20 (ოცი!) ლარი (ანუ, 1 აჭარული ხაჭაპურის ფასი).
  6. უმუშევართა კატეგორიაში არ შედის ის, ვისაც იმედი გადაეწურა, რომ სამსახურს იპოვის, სახლში ზის და შიმშილობს.
  7. 200 გრამი ყავა ან 1 ლიტრი რძე დაახლოებით 300%-ით უფრო ძვირია, ვიდრე ევროპის დედაქალაქების სუპერმარკეტებში.

და ა.შ. და ა.შ.

ხომ არ გგონიათ ეს არასამთავრობო ან საერთაშორისო ორგანიზაციების (მტრებად შერაცხულების!) მონაცემებია? არა ბატონო, თავად „ქართული ოცნების“ ხელისუფლების მიერ აღიარებული ფაქტებია.

ჰოდა, „ცარიელი მშვიდობა მიწაშიაც გვეყოფის“.