საქართველოს პრეზიდენტმა სალომე ზურაბიშვილმა „უცხოური გავლენის გამჭვირვალობის შესახებ“ კანონს ვეტო დაადო.

ამასთან დაკავშირებით, სამოქალაქო საზოგადოების ფონდის იურისტი საბა ბრაჭველი სოციალურ ქსელში პოსტს აქვეყნებს:

„ვეტოს უფლებამოსილების დაუყოვნებლივ გამოყენებით, პრეზიდენტმა:

  • დაასრულა გაურკვევლობა ვეტოს მოლოდინთან დაკავშირებით;
  • შეამცირა კანონთან დაკავშირებით ვაჭრობის სივრცე, რის გაჩენაზეც ოცნება ბოლო კვირა აქტიურად მუშაობდა;
  • აირიდა წნეხი, რომელიც ვენეციის დასკვნის შემდეგ მასზე წამოვიდოდა (ყველა დაუწყებდა ჭკუის სწავლებას, რა ფორმისა თუ შინაარსის ვეტო აჯობებდა);
  • სრულად გადაიტანა წნეხი ოცნებაზე – ახლა მათი გადასაწყვეტია, დაძლევენ ვეტოს, არ დაძლევენ, გაითვალისწინებენ ვენეციის შენიშვნებს, უგულებელყოფენ, გადადებენ, დააბრუნებენ, თუ რას იზამენ.

ეს ბოლო გათვლა ყველაზე მართებული და სწორია – კომისიის დასკვნა ვეტოს შინაარსისთვის კი არა, კანონის ავტორებისთვის იწერება. კანონთან დაკავშირებით სრული პოლიტიკური პასუხისმგებლობა უნდა იყოს და იქნება კიდეც მხოლოდ ხელისუფლებაზე და არავისზე სხვაზე.

ახლა მათ უნდა გადაწყვიტონ, უღირთ თუ არა რუსული კანონის მიღება კომისიის დასკვნის უგულებელყოფის, ქვეყნის საერთაშორისო იზოლაციის, სამომავლო აქციებისა და საკუთარი ოჯახების სანქცირების ფასად“, – ნათქვამია საბა ბრაჭველისგან გავრცელებულ ინფორმაციაში.