1989 წლის 9 აპრილს, ჯერ კიდევ საბჭოთა საქართველოს დედაქალაქში, დამოუკიდებლობის მოთხოვნით რუსთაველის გამზირზე ათიათასობით ადამიანი შეიკრიბა.

მშვიდობიანი აქცია საბჭოთა ჯარებმა დაარბიეს. თავისუფლების მოთხოვნით შეკრებილებს, დილის 4 საათზე, კრემლის მითითებით, სპეცრაზმელები მძიმე ტექნიკით დაესხნენ თავს, – მშვიდობიან მომიტინგეებს გზა ჯერ ტანკებით ჩაუხერგეს, შემდეგ დემონსტრანტებს ნიჩბებითა და მხუთავი აირით გაუსწორდენენ.

9 აპრილის აქციის დარბევის შედეგად 21 ადამიანი დაიღუპა. აქედან 17 ქალია. გარდაცვლილებს შორის იყო არასრულწლოვანებიც.

9 აპრილის დარბევის შედეგად, 4 ათასზე მეტი დემონსტრანტი სხვადასხვა სახის ტრავმით საავადმყოფოში მოათავსეს. ქიმიური ნივთიერებით მოიწამლა 2000-მდე მოქალაქე.

1989 წლის 9 აპრილიდან ზუსტად ორი წლის შემდეგ, 1991 წლის 9 აპრილს, საქართველოს უზენაესმა საბჭომ, ზვიად გამსახურდიას მეთაურობით, საქართველოს დამოუკიდებლობის აქტი მიიღო.

9 აპრილი საქართველოს უახლეს ისტორიაში ჩაიწერა ტრაგედიისა და ამავდროულად, საქართველოს დამოუკიდებლობის აღდგენის დღედ.