ხარაგაულის მოსწავლე-ახალგაზრდობის სახლის მაკრამეს წრის მოსწავლეებმა წრის მეცადინეობაზე დამზადებული ნაკეთობებით ნინოობის დღესასწაული ხარაგაულში მცხოვრებ ნინოებს მიულოცეს.

ამ მიზნით ისინი „ჩემი ხარაგაულის“ რედაქციაშიც გვესტუმრენ.

„მაკრამე უძველესი ხელობაა და ხელით წვნას ნიშნავს, – ამბობს მაკრამეს წრის ხელმძღვანელი მარინე ვეფხვაძე, – ძველ ეგვიპტეში მაკრამეს ნაკეთობებს მიიჩნევდნენ ერთგვარ თილისმად, რომელსაც მისი მფლობელისთვის წარმატების მოტანა, განსაცდელისგან დაცვა, გუნება-განწყობის გაუმჯობესება და სურვილების ახდენაში დახმარება შეეძლო.

ჩემმა მოსწავლეებმაც ამ ნაკეთობებში დიდი სიყვარული ჩააქსოვეს. გილოცავთ ყველა ნინოს ნინოობას და წარმატებებს გისურვებთ“.