განათლებისა და მეცნიერების სამინისტრო საჯარო სკოლის დირექტორობის მსურველთა სერტიფიცირების პროცესს იწყებს.

დირექტორობის მსურველთა სერტიფიცირება ორ საფეხურს – ტესტირებასა და გასაუბრებას მოიცავს.

სერტიფიცირების მსურველთა რეგისტრაცია 2022 წლის 24 ოქტომბრიდან 4 დეკემბრის ჩათვლით იქნება შესაძლებელი შემდეგ ბმულზე.

აღსანიშნავია, რომ სერტიფიცირების პროცესში მონაწილეობის შესაძლებლობა მიეცემათ უმაღლესი განათლების მქონე საქართველოს მოქალაქეებს, რომელთაც მუშაობის არანაკლებ 3-წლიანი გამოცდილება აქვთ.

2020 წელს გამოცხადებული დირექტორობის მსურველთა შესარჩევი კონკურსის ფარგლებში უკვე დარეგისტრირებული პირები ხელახალ რეგისტრაციას აღარ საჭიროებენ.

სკოლის დირექტორობის მსურველთა სერტიფიცირება 2020 წლის გაზაფხულზე უნდა ჩატარებულიყო, რადგან იმ დროისთვის სკოლების დირექტორებს უფლებამოსილების ვადა ეტაპობრივად ეწურებოდათ ანუ უმრავლესობა ორი ვადით (12 წელი) ხელმძღვანელობდა სკოლას. მაშინ ეს კონკურსი კორონავირუსით გამოწვეული პანდემიის მიზეზით გადავადდა.

დირექტორობის მსურველთა საგამოცდო პროგრამა და ტესტის ნიმუშები 24 ოქტომბრიდან ხელმისაწვდომი იქნება ვებგვერდზე.

26 ოქტომბრიდან დირექტორობის მსურველებს ექნებათ საშუალება ვებგვერდზე ვებინარის სახით მიიღონ კონსულტაცია შემდეგ თემებზე:

  1. სკოლის დირექტორის სტანდარტი;
  2. განათლების ხარისხის მართვის მექანიზმები;
  3. სკოლის სტრატეგიული დაგეგმვა და განვითარება;
  4. სასკოლო კურიკულუმის შემუშავება;
  5. სასკოლო კურიკულუმის დანერგვა: მოსწავლეზე ორიენტირებული პროცესი;
  6. სასკოლო კურიკულუმის მონიტორინგი და შეფასება;
  7. ადამიანური რესურსების მართვა და განვითარება;
  8. ადამიანებისა და პროცესების უსაფრთხოება;
  9. მატერიალური და ფინანსური რესურსების მართვა;
  10. საინფორმაციო რესურსები და სტრატეგიული კომუნიკაცია;
  11. მოსწავლეთა უფლებების დაცვა და მათი მხარდაჭერის ღონისძიებები;
  12. სასკოლო კულტურის ფორმირება.

სერტიფიცირებით დაინტერესებულ პირებს შესაძლებლობა ექნებათ, კონკრეტული შეკითხვები გამოაგზავნონ ელექტრონულ ფოსტაზე directors@emis.ge

ამასთან, ხშირად დასმული კითხვების ანალიზის საფუძველზე, 2022 წლის 30 ოქტომბრიდან 16 დეკემბრის ჩათვლით პერიოდულად გაიმართება საინფორმაციო შეხვედრები, სადაც დაინტერესებული მხარეები მათთვის საინტერესო საკითხებზე ამომწურავ ინფორმაციას მიიღებენ.

წყარო