მარელისში რკინიგზაზე გარდამავალი, სტიქიისგან დაზიანებული ხიდისა და საავტომობილო გზის აღდგენა იწყება.

საავტომობილო გზების დეპარტამენტმა ამ მიზნით ხელშეკრულება, გამარტივებული ტენდერით, შპს Construction Service-თან გააფორმა.

უშუალოდ აღდგენითი სამუშაოების დაწყებამდე, ამავე კომპანიის ვალდებულებაა საპროექტო-სახარჯთაღრიცხვო დოკუმენტაციის მომზადებაც. ხელშეკრულებით, რომლის ღირებულება 8 550 000 ლარია, სტიქიისგან დაზიანებული გზისა და ხიდის აღდგენა 2022 წლის 31 ოქტომბისთვის არის განსაზღვრული.

შეგახსენებთ, რომ 7 მარტს მარელისის რკინიგზის სადგურის მიმდებარედ, ძირულა-ხარაგაული-მოლითი-ფონა-ჩუმათელეთის გზის 24-ე კილომეტრზე,  ჩამოწოლილმა მეწყერმა დააზიანა რკინიგზაზე გარდამავალი არსებული ხიდი, რკინიგზის ლიანდაგი და საკონტაქტო ხაზი.