ხარაგაულის მუნიციპალიტეტის სოფელ საქასრიაში კორონავირუსის პირველი შემთხვევა 11 აპრილს დაფიქსირდა და ამ დრომდე, მხოლოდ ამ სოფელში, ინფიცირებულთა რაოდენობა 12-მდე გაიზარდა.

ეპიდემიოლოგიურ ვითარებას ადგილზე გაეცვნენ დაავადებათა კონტროლის ეროვნული ცენტრის იმერეთის რეგიონული სამმართველოს უფროსი გოჩა გიორგიძე და ეპიდემიოლოგი მაკა წილოსანი.

მათთან ერთად საქასრიაში ხარაგაულის საზოგადოებრივი ჯანდაცვის ცენტრის დირექტორი შმაგი ხიჯაკაძე, ამავე ცენტრის ექიმი ნინო ყიფშიძე და ხარაგაულის სასწრაფო დახმარების უფროსი გიორგი ბარბაქაძე იმყოფებოდნენ.

საქასრიაში 42 ოჯახი, დაახლოებით 140 ადამიანი ცხოვრობს. 12 ინფიცირებულიდან 3 სტაციონარში, ხოლო 9 ბინაზე მკურნალობს. მათი ჯანმრთელობის მდგომარეობა დამაკმაყოფილებელია.

გოჩა გიორგიძის რეკომენდაციით, სასურველია სოფლის აღნიშნული უბნის იზოლაცია 12 დღით. თვითიზოლაციის პირობების დაცვაზე მინიტორინგი პოლიციამ უნდა განახორციელოს.

თვითიზოლაციაში იმყოფებიან ის პირები, რომლებიც რიკოთის ავტობანის მშენებელ ჩინურ კომპანიაში მუშაობენ. გოჩა გიორგაძე და ეპიდემიოლოგი მაკა წილოსანი გზის მშენებელი ჩინური კომპანიის წარმომადგენლებსაც შეხვდნენ და, ეპიდემიოლოგიური ვითარებიდან გამომდინარე, კომპანიას შემდეგი რეკომენდაციები მიაწოდეს:

  • შესამუშავებელია კომპანიის თანამშრომლების ტესტირების შიდა პროტოკოლი;
  • იმ ტესტირების აღრიცხვისათვის, რომელსაც კომპანია ატარებს თავისი რესურსებით (ანტიგენ ტესტირება), საჭიროა კორონა ლაბ-ის ელექტრონულ მოდულთან წვდომა;
  • შიდა ტესტირებისას გამოვლენილი დადებითი შემთხვევების შესახებ საჭიროა ხარაგაულის საზოგადოებრივი ჯანდაცვის ცენტრისთვის ინფორმაციის მიწოდება,რათა ეს შემთხვევები კონტროლს მიღმა არ დარჩეს;
  • გამკაცრდეს მონიტორინგი თანამშრომელთა ჯანმრთელობაზე და საეჭვო ჩივილების დროს ტესტირების ჩატარება გახდეს აუცილებელი.

ფოტოზე: შეხვედრა რიკოთის ავტობანის მშენებელთან