დღეიდან სასწავლო პროცესი საკლასო ოთახებში განახლდა, თუმცა კულტურული სასწავლო წრეების მუშაობა კვლავ შეზღუდულია.

ხარაგაულის მოსწავლე-ახალგაზრდობის სახლის დირექტორის, მაია ბლუაშვილის, ინფორმაციით, პირველი თებერვლიდან მოსწავლეთა სახლის წრეები ონლაინ სწავლებას დაიწყებენ.

„მათემატიკის, მხარეთმცოდნეობის, ინგლისურის წრეების ხელმძღვანელები დღეიდან მოსწავლეებს დისტანციურად დაუკავშირდებიან. დისტანციური სწავლების პროგრამა პედაგოგებმა უკვე წარმოადგინეს. სწავლას საკლასო ოთახებში ალბათ პირველი მარტიდან შევუდგებით“, – ამბობს მაია ბლუაშვილი.

სკოლების მსგავსად, სწავლა საკლასო ოთახებში განახლდება ხარაგაულის სამუსიკო სკოლაში.

„სწავლას, ტრადიციულად, სამუსიკო სკოლის შენობაში განვაახლებთ. ყველა არსებულ რეკომენდაციას შეძლებისდაგვარად გავითვალისწინებთ. რა თქმა უნდა, ვერავის დავაძალებთ. იმედია, მოსწავლეები გაკვეთილებზე ივლიან,“ – ამბობს ხარაგაულის სამუსიკო სკოლის დირექტორი ლალი ალექსიძე.

ქორეოგრაფიული და სპორტული წრეების მუშაობა კვლავ შეზღუდულია. ეს წრეები მეცადინეობას, სავარაუდოდ, პირველი მარტიდან განაახლებენ.

თამთა გოგოლაძე