გარემოსდაცვითი ზედამხედველობის დეპარტამენტმა ოქტომბერში მთელ ქვეყანაში ხე-ტყის უკანონო მოპოვებისა და ტრანსპორტირების 93 ფაქტი გამოავლინა, მათ შორის 2 ფაქტი სისხლის სამართლის დანაშაულის ნიშნებს შეიცავს.

ხე-ტყის უკანონო მოპოვებისა და ტრანსპორტირების ყველაზე მეტი – 37 ფაქტი გამოვლინდა კახეთში. იმერეთში დაფიქსირდა 11 ფაქტი, სამცხე-ჯავახეთში – 10, მცხეთა-მთიანეთსა და ქვემო ქართლში – 6-6, სამეგრელო-ზემო სვანეთშიც – 6, აჭარაში – ასევე 6, შიდა ქართლში – 5, რაჭა-ლეჩხუმსა და ქვემო სვანეთში – 3, გურიაშიც – 3.

ჯამში, ამოღებულია უკანონოდ მოპოვებული 1 441 კბმ ხე-ტყე.

ამავე პერიოდში, დაფიქსირდა სახერხი საამქროს ტექნიკური რეგლამენტის დარღვევის 16 ფაქტი.

გარემოსდაცვითი ზედამხედველობის დეპარტამენტიდან მოპოვებული ინფორმაციით, ოქტომბერში ხარაგაულის მუნიციპალიტეტში გამოვლენილია ხე-ტყის უკანონო ჭრის 1 და ტრანსპორტირების 2 ფაქტი.

მასალები, შემდგომი რეაგირებისთვის, შესაბამის უწყებებშია გადაგზავნილი.