17 წლამდე ასაკის ბავშვებისთვის 200-ლარიანი დახმარების მისაღებად რეგისტრაცია დაიწყო.

რამდენად მარტივია ელექტრონულ პორტალზე daxmareba.moh.gov.ge დარეგისტრირება და გაიარეს თუ არა რეგისტრაცია ხარაგაულელმა მშობლებმა, ამის გასარკვევად რამდენიმე მათგანს დავუკავშირდით.

მშობლების უმრავლესობა საიტის გაუმართაობაზე საუბრობს და ამბობს, რომ მომხმარებელთა დიდი ნაკადის გამო საიტზე რეგისტრაცია რთულია.

„საიტი ძალიან გადატვირთულია, რეგისტრაცია მეუღლეს გადავაბარე. თუმცა, ჯერჯერობით, მანაც ვერ შეძლო. იმედი მაქვს, რამდენიმე დღეში უმრავლესობა დარეგისტრირდება და ისევ ვცდით“, – ამბობს ზვიად ორჯონიკიძე.

მშობლების ნაწილი დახმარების მისაღებად დარეგისტრირებას არ ჩქარობს, რადგან რეგისტრაცია დეკემბრამდეა შესაძლებელი. სოფლად მცხოვრებ მშობლებს დასარეგისტრირებლად ხარაგაულის რაიონულ ცენტრში უწევთ ჩამოსვლა, რადგან სოფელში ინტერნეტში ჩართული კომპიუტერის მოძებნა რთულია.

იამზე დვალი ამჟამად სოფელში იმყოფება, ინტერნეტზე ხელი არ მიუწვდება, ამიტომ დარეგისტრირება ვერ მოახერხა.

„ხარაგაულის სოციალური მომსახურების სააგენტოში რამდენიმე დღეში მივალ და შევეცდები, იქ დავრეგისტრირდე“, – ამბობს იამზე.

„15 აგვისტოს დარეგისტრირება ვერ შევძელი, – ამბობს ლალი ფერაძე, – მომდევნო დღეს დილით ადრე ისევ ვცადე და რეგისტრაცია გავიარე. ჩემი შვილების რეგისტრაციის შემდეგ, თანამშრომლების ბავშვებიც უპრობლემოდ დავარეგისტრირე“.

იმ შემთხვევაში, თუ ელექტრონულ პორტალზე daxmareba.moh.gov.ge დარეგისტრირებას ვერ ახერხებთ, შეგიძლიათ მიმართოთ:

  • სოციალური მომსახურების სააგენტოს ნებისმიერ ტერიტორიულ ერთეულს;
  • ადგილობრივ თვითმმართველობებს;
  • იუსტიციის სახლებს;
  • საზოგადოებრივ ცენტრებს;
  • „ლიბერთი ბანკის“ ფილიალებს.

ელექტრონულ პორტალზე უნდა განთავსდეს შემდეგი სახის ინფორმაცია:

  • ბავშვის სახელი, გვარი, დაბადების თარიღი, პირადი ნომერი;
  • მშობლის/კანონიერი წარმომადგენლის სახელი, გვარი, პირადი ნომერი;
  • მშობლის/კანონიერი წარმომადგენლის სახელზე კომერციულ საბანკო დაწესებულებაში გახსნილი საბანკო ანგარიშის რეკვიზიტები (ბანკის ანგარიშის ნომერი);
  • საკონტაქტო მობილური, რომელზეც მოკლე ტექსტური შეტყობინებები გაიგზავნება.

ელექტრონულ პორტალზე შესაბამისი დოკუმენტაციის ატვირთვა 24 საათის განმავლობაშია შესაძლებელი.

დამატებითი ინფორმაციის მიღება შესაძლებელია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ცხელ ხაზზე – 1505.