ხარაგაულის მუნიციპალიტეტის სოფელ კიცხში სკოლის მშენებლობა გრძელდება.

ამჟამად შენობის გადახურვა, ელექტროქსელის მოწყობა და კედლების შელესვა მიმდინარეობს.

პროექტის მენეჯერის, გია დავითულიანისგან მოპოვებული ინფორმაციით, კიცხის სკოლის მშენებლობის დასრულების თარიღმა, პანდემიის გამო, 45 დღით გადაიწია.

მისი თქმით, სკოლის მშენებლობა, სავარაუდოდ, ნოემბრის დასაწყისში დასრულდება.

კიცხის საჯარო სკოლის დირექტორი თამარ წიწილაშვილი ამბობს, რომ ახალ სასწავლო წელს სწავლას კვლავ თეთრაწყაროს სკოლაში დაიწყებენ. ის იმედს გამოთქვამს, რომ კიცხის საჯარო სკოლა იქნება თანამედროვე სტანდარტების და ხარისხიანად აგებული.

„ახლა ჩვენი მთავარი გამოწვევაა, დავიცვათ პანდემიასთან დაკავშირებული რეგულაციები და მოსწავლეებს თეთრაწყროს სკოლის კორპუსში მაქსიმალურად კომფორტული გარემო დავახვედროთ“, – ამბობს თამარ წიწილაშვილი.

ხარაგაულის მუნიციპალიტეტის სოფელ კიცხში 150 მოსწავლეზე გათვლილ შენობას  2 420 643 ლარად ამხანაგობა შპს „ინ-სი“ და შპს „ქალაქპროექტი“ აშენებს.