2025 წლის 11 თებერვლიდან თბილისი-ოზურგეთის მატარებლის განრიგის შეცვლამ ჩხერიმელას ხეობის სოფლების მოსახლეობას ტრანსპორტირება გაურთულა.

საქმე იმაშია, რომ ამ ყოველდღიური მატარებლით ხაშური-ზესტაფონის მონაკვეთზე მგზავრობა ერთი ლარი ღირდა. ახლა თბილისი-ოზურგეთის სწრაფი მატარებელი დღეგამოშვებით მოძრაობს და ხაშური-ზესტაფონის მონაკვეთზე მგზავრობა 11 ლარი ღირს; ოზურგეთიდან მომავალი ეს მატარებელი სადგურ წიფაში არ აჩერებს.

„ამ ამბით ყველაზე მეტად ჩხერიმელას ხეობის სოფლების მოსახლეობა დაზარალდა, – ამბობს ნებოძირელი სპარტაკ ლაცაბიძე, – მოლითიდან ხარაგაულში, ზესტაფონში ან ხაშურში დილის „მასტერაოზე“, სურსათის ან წამლის შესაძენად წასულ ადამიანს რკინიგზის სადგურში საღამოს „მასტერაომდე“ მოუწევს ლოდინი.

მოლითიდან ხარაგაულამდე ან ხაშურამდე მგზავრობისთვის 11 ლარს სოფელში მაცხოვრებელი როგორ გადაიხდის; გადახდა რომც შეძლონ, თბილისი-ოზურგეთის მატარებელი დღეგამოშვებით დადის. ახლა გამოსავალი შუადღის „მასტერაოს“ დანიშვნაა. კორონავირუსის პანდემიამდე ეს მატარებელი შუადღისას მოძრაობდა. მოლითი-ფონა-ჩუმათელეთის საავტომობილო გზის აღდგენამდე, ჩხერიმელას ხეობის სოფლების მოსახლეობას სხვა ალტერნატივა არ გვაქვს“.

წიფის სკოლის მასწავლებლები გაკვეთილების შემდეგ ხაშურში დაბრუნებას გზაზე გამვლელი მანქანით ცდილობენ. ამ მონაკვეთზე ავტომობილით, თუ ძალიან სასწრაფო და აუცილებელი საქმე არ გაქვს, არ წახვალო, – ამბობენ ადგილობრივები, რადგან მშენებარე საავტომობილო გზა უმძიმეს მდგომარეობაშია.

ხაშურიდან კვირაში ოთხჯერ სჭირდება სკოლამდე მგზავრობა მარელისის სკოლის მასწავლებელ ირინა კუპატაძეს. ის ამბობს, რომ 11-ლარიანი ბილეთის შეძენას როგორღაც შეძლებს, თუმცა, რადგან ოზურგეთი-თბილისის მატარებელი დღეგამოშვებით მოძრაობს, ის იძულებულია, გაკვეთილების შემდეგ მარელისიდან ხარაგაულში ან ზესტაფონში ჩავიდეს და იქედან თბილისის მიმართულებით მოძრავ მიკროავტობუსს ხაშურამდე გაჰყვეს. მისთვის რთულია 6 საათის განმავლობაში საღამოს „მასტერაოსთვის“ ლოდინი.

ირინა კუპატაძემ და მის მდგომარეობაში მყოფმა მასწავლებლებმა განათლების პროფკავშირის ხარაგაულის რაიონულ ორგანიზაციას მიმართეს, რომ ამ პრობლემის მოგვარებაში ხარაგაულის ადგილობრივ ხელისუფლებასთან უშუამდგომლოს. ამ ორგანიზაციის თავმჯდომარე ლალი სებისკვერაძემ მუნიციპალიტეტის მერს 18 თებერვალს წერილობით მიმართა.

17 თებერვლიდან „საქართველოს რკინიგზამ“, მხოლოდ რკინიგზელების ტრანსპორტირებისთვის, ხაშური-ზესტაფონის მონაკვეთზე შუადღის მატარებელი დანიშნა.

წიფის მოსახლეობა მოითხოვს, რომ „საქართველოს რკინიგზამ“ მგზავრებს ან რკინიგზელებისთვის გამოყოფილ მატარებელში ასვლის უფლება მისცეს, ან დამატებით შუადღისას დაინიშნოს ხაშური-ზესტაფონი-ხაშურის მიმართულებით მოძრავი მატარებელი.

წიფაში მცხოვრებმა 70-მა მოქალაქემ „საქართველოს რკინიგზაში“ შუამდგომლობისთვის წერილობით მიმართა პაატა კვიჟინაძეს, საქართველოს პარლამენტში „ქართული ოცნების“ საჩხერე-ჭიათურა-ხარაგაულის დელეგატს.

„ქართული ოცნების“ დელეგატის ხარაგაულის ბიუროს ხელმძღვანელი ნანა ცხვედაძე გვპასუხობს, რომ „საქართველოს რკინიგზასთან“ მიღწეულია შეთანხმება, ტექნიკური დეტალები გვარდება და შუადღისას რკინიგზელებისთვის ზესტაფონი-ხაშურის მონაკვეთზე მოძრავ მატარებელს ერთი ვაგონი დაემატება. თუმცა, კონკრეტულად როდის, ჯერჯერობით უცნობია.

ნინო კაპანაძე