5 თებერვალს წიგნის საჯაროდ კითხვის მსოფლიო დღე აღინიშნა. საქართველოში ამ დღისადმი მიძღვნილი ღონისძიებები წიგნის გამომცემელთა და გამავრცელებელთა ასოციაციის ინიციატივით, მეათედ ტარდება.

ამ დღეს მსოფლიო საზოგადოება ერთიანდება სლოგანით: იკითხე ხმამაღლა, შეცვალე მსოფლიო! ეს დღე ადამიანებს შესაძლებლობას აძლევს გაერთიანდნენ, გაიზიარონ წიგნის ხმამაღლა კითხვის სიხარული და შეიტანონ წვლილი კითხვის პოპულარიზაციაში.

„ეროვნული ბიბლიოთეკის რეკომენდაციით, წიგნის საჯაროდ კითხვის დღისადმი მიძღვნილი ღონისძიებები, 5 თებერვალს, მთელ საქართველოში ერთდროულად დავიწყეთ, – ამბობს ხარაგაულის საბიბლიოთეკო განყოფილებათა ხელმძღვანელი ნანა ლურსმანაშვილი, – ამ დღესთან დაკავშირებით ღონისძიებები ხარაგაულის საბიბლიოთეკო გაერთიანებაში შემავალ 25-ვე ბიბლიოთეკაში გაიმართა.

ცენტრალურ ბიბლიოთეკაში აქტიური მკითხველების ნაწილი მოვიწვიეთ. მათ ლექსები წაიკითხეს. ამ დღეს საზოგადოებას კიდევ ერთხელ შევახსენეთ წიგნისა და ბიბლიოთეკის მნიშვნელობა“.

„წიგნი მნიშვნელოვანია ყველა იმ ადამიანისთვის, ვისაც ცოდნის მიღება სურს, – ამბობს მარიამ თაბუკაშვილი, ხარაგაულის გიმნაზიის XII კლასის მოსწავლე, – წიგნიერი ადამიანი მეტ წვლილს შეიტანს მუნიციპალიტეტისა და ქვეყნის განვითარებაში. წიგნი გვზრდის, საინტერესო სამყაროში გვამოგზაურებს და ცხოვრებას გვილამაზებს“.

წიგნის საჯაროდ კითხვის მსოფლიო დღისადმი მიძღვნილი ღონისძიება „ხარაგაულის კვარტეტმა“ სიმღერებით გაალამაზა.