ბავშვთა დაცვის საერთაშორისო დღისადმი მიძღვნილი კვირეული ხარაგაულში მოსწავლე-ახალგაზრდობის სახლის (დირექტორი ჰამლეტ ბერაძე) კონცერტით დაიწყო.

კონცერტზე მოსწავლეთა სახლის აღსაზრდელებმა წარმოგვიდგინეს მუსიკალური ნომრები ქართული კინოფილმებიდან (საესტრადო წრის ხელმძღვანელლი დარეჯან გვაძაბია).

ღონისძიებაზე ლექსები მხატვრულად წაიკითხეს ლიტერატურული წრის მოსწავლეებმა (პედაგოგი ლალი შარაშიძე), ხალხური სიმღერა – „ხმა ამაოღე, ფანდურო“ ფოლკლორულმა გუნდმა შეასრულა (ხელმძღვანელი რეზო შარიქაძე).

მოსწავლეთა მონაწილეობით გათამაშდა ნაწყვეტი ფილმებიდან „შერეკილები“ და „მე, ბებია, ილიკო და ილარიონი“.

ბავშვთა დაცვის დღისადმი მიძღვნილი კვირეულის ფარგლებში 1 ივნისs „სათნოების სახლი“, მერიის სოციალური სამსახურის ბავშვთა უფლებების დაცვის განყოფილების მხარდაჭერით, სამიზნე ჯგუფის მოზარდებისთვის, სადღესაწაულო შოუს გამართავს. ბავშვებს დაურიგდებათ საჩუქრები;
3 ივნისს, 12:00 საათზე, ისტორიულ მუზეუმში მოსწავლეთა ნამუშევრების გამოფენა გაიმართება. პატარებს მუზეუმის ეზოში, ღია სივრცეში, სახალისო აქტივობები – „მოხატული კერამიკა“ და „პატარა არქეოლოგები“ – ელოდებათ;
5 ივნისს ხარაგაულის საბავშვო ბიბლიოთეკა 13:00 საათზე ანა კალანდაძის პოეზიის საღამოს გამართავს ხარაგაულის #3 საჯარო სკოლის მოსწავლეთა მონაწილეობით;
5 ივნისს 15:00 საათზე დაგეგმილია ხარაგაულის შოთა ბუაჩიძის სახელობის სამუსიკო სკოლაში კლასიკური მუსიკის კონცერტი.