თავისუფალი უნივერსიტეტის საერთაშორისო ურთიერთობების ფაკულტეტის სტუდენტმა ლიზა ბარბაქაძემ ბრიტანეთის საელჩოსგან გამოცხადებულ კონკურსში გაიმარჯვა და ერთი დღით ბრიტანეთის ელჩის მოვალეობას შეასრულებს.

„ამ კონკურსის შესახებ ინფორმაცია ლექტორმა გაგვიზიარა, – ამბობს ლიზა, – კონკურსი ქალების წახალისებას და გენდერული საკითხების პოპულარიზაციას ისახავს მიზნად. კონკურსანტებს ინგლისურ ენაზე უნდა დაგვეწერა თემა – რომელ ბრიტანელ ქალს გვინდა შევხვდეთ, რატომ და ვინ არის ჩვენი ცხოვრების შთაგონების წყარო.

მე დავწერე კარენ ფიერსზე, რომელიც გაეროში დიდი ბრიტანეთის მუდმივი წარმომადგენელია; ასევე დავწერე, რომ ჩემი შთაგონების წყაროა ჩემი პედაგოგი ბებია, რომელმაც მრავალი თაობა აღზარდა. გავიმარჯვე და 7 მარტს შევასრულებ ბრიტანეთის ელჩის მოვალეობას, გავეცნობი მის საქმიანობას.

ეს ჩემთვის დიდი წარმატებაა და ძალიან გახარებული ვარ. ბრიტანეთის ელჩს – მარკ კლეიტონს ადრეც შევხვდი, როცა ამ საელჩოს ერთ-ერთ კონკურსში გავიმარჯვე. მაშინაც ვუთხარი და ახლაც მინდა მივაწოდო იდეა, რომ ხარაგაულში ჩამოვიდეს“.

ვულოცავთ ლიზას ამ გამარჯვებას და შემდგომ წარმატებებს ვუსურვებთ. ლიზა ბარბაქაძე ხარაგაულის #2 საჯარო სკოლისა და „ჩემი ხარაგაულის“ რედაქციასთან მოქმედი ჟურნალისტთა სკოლა „იმედი ხვალის“ კურსდამთავრებულია.