რა მნიშვნელობა აქვს დამოუკიდებელი მედიის ფუნქციონირებას და რა შეიცვლება შესაძლო ცენზურის პირობებში, –  ამ საკითხებზე საზოგადოებრივი მონიტორინგისა და კვლევის ცენტრის დამფუძნებელი ინგა მაღრაძე საუბრობს.

„მგონია, რომ სიტყვისა და აზრის გამოხატვის თავისუფლება, ეს არის დემოკრატიის ძირითადი პრინციპი და მყარად დასაცავი იმისათვის, რომ ქვეყანა განვითარდეს და ჩვენ უკეთესად ვიყოთ, – ამბობს ინგა მაღრაძე, – ჩვენ გვჭირდება მომავალი განვითარება. ამისთვის, არ უნდა მივცეთ საშუალება არაგონიერ ხელისუფალს, რომ გამოხატვის თავისუფლება შეზღუდოს და ცენზურა დაგვიწესოს.

დამოუკიდებელი მედია – ეს არის ძალიან მნიშვნელოვანი მექანიზმი საზოგადოებისა და ხალხის ხელში; ამიტომ ცდილობს ხელისუფლება არ ითანამშრომლოს, არ აქციოს პარტნიორად, რადგან არ სურს, თვალი გაუსწოროს იმ პრობლემებს, რომლებიც მისი მმართველობის პროცესშია“.