„სოფლის მხარდაჭერის პროგრამა – 2022“ იწყება.

ამის შესახებ ინფორმაცია ხარაგაულის მუნიციპალიტეტის მერის, კობა ლურსმანაშვილისგან მოვიპოვეთ. მისი ინფორმაციით, სოფლის მოსახლეობასთან შეხვედრები, პროექტების შესარჩევად, აუცილებლად უნდა შედგეს.

„დრო რომ არ დავკარგოთ, მერიის პასუხისმგებელი პირებისგან მოსახლეობასთან შეხვედრებისთვის მინიმუმ ორი-სამი ჯგუფი შედგება, – ამბობს კობა ლურსმანაშვილი, – გვინდა, შეხვედრები რაც შეიძლება სწრაფად დავასრულოთ და სამუშაოები დროულად დავიწყოთ.

2021 წელს ხარაგაულის მუნიციპალიტეტს სოფლის მხარდაჭერის პროგრამით 890 000 ლარი გამოეყო. ამ თანხით 150-მდე პროექტი განხორციელდა. სოფლისთვის დაფინანსების გამოყოფის კრიტერიუმები არ შეცვლილა და, სავარაუდოდ, არც თანხის ოდენობა შეიცვლება.

დაფინანსების გაზრდას მივესალმები, რადგან წელს ამ თანხით გაცილებით ნაკლები საქმის გაკეთებას შევძლებთ; მაგალითად, წყლის სისტემების მოწყობისთვის საჭირო ავზებისა და მილების ფასი, წინა წლებთან შედარებით, გაძვირდა.

მოსახლეობასთან შეხვედრებს ორშაბათიდან, 21 თებერვლიდან, დავიწყებთ“, – ამბობს ხარაგაულის მერი.

შეგახსენებთ, რომ

  • დასახლებას, სადაც 200-მდე მაცხოვრებელია, 10 000 ლარი გამოეყოფა;
  • თუ სოფელში მაცხოვრებელთა რაოდენობა 201-დან 400-მდეა -12 000 ლარი;
  • დასახლებას, სადაც 401-დან 1000 მაცხოვრებლამდეა – 16 000 ლარი;
  • ხოლო იმ სოფელს, სადაც მოსახლეობის რაოდენობა 1000-ს აღემატება – 20 000 ლარი.

ხარაგაულის თვითმმართველობაში სოფლის მოსახლეობასთან შეხვედრების გრაფიკს აზუსტებენ.

„ჩემი ხარაგაულის“ რედაქციას როგორც კი ამ გრაფიკს მოვიპოვებთ, ჩვენს მკითხველებსაც დაუყოვნებლივ გაგაცნობთ.

ფოტოზე – ბაზალეთის მოსახლეობასთან შეხვედრაზე; 15 თებერვალი, 2021 წ.