ამის შესახებ დაავადებათა კონტროლის ეროვნული ცენტრის დირექტორმა ამირან გამყრელიძემ განაცხადა.

„არ ვიცი, საკოორდინაციო საბჭო რამდენად გაითვალისწინებს, მაგრამ დაავადებათა კონტროლის ცენტრის რეკომენდაციაა, რომ სანამ დადებითობის მაჩვენებელი 4%-ს ქვემოთ არ ჩამოვა და სკოლაში ადმინისტრაციული პერსონალის, პედაგოგ-მასწავლებლების 80% არ აიცრება, სკოლას უსაფრთხოდ ვერ განვიხილავთ.

27 აგვისტოს მონაცემებით, დადებითობის მაჩვენებელი 9.43%-ია.

ამიტომ სასურველია, რომ მასწავლებლები, ადმინისტრაციული პერსონალი აიცრას სკოლებში და საერთო ეპიდსიტუაცია გაუმჯობესდეს. მხოლოდ ასეთ სიტუაციაში განვიხილავთ სწავლის დასწრებული ფორმით განახლებას.

იგივე შეხედულება მაქვს უნივერსიტეტებთან მიმართებაშიც – დასწრებული სწავლებისთვის რამდენიმე კრიტერიუმი უნდა დაკმაყოფილდეს – უნდა აიცრან არა მარტო პროფესორ-მასწავლებლები, არამედ ასევე სტუდენტები.

ქვეყანაში დღეს 150 000 სტუდენტია. კორონავირუსის დელტა შტამი ახალგაზრდებში ძალიან ადვილად ვრცელდება, ადვილად გადამდებია. ამიტომ სასურველია, რომ სწავლის დაწყებისთვის ყველა უნივერსიტეტი, ყველა სკოლა უსაფრთხო იყოს“.