„მოხერხებული“ მაყურებელი

კონცერტი ვატარებთ კურორტ საირმეში. დილიდან გადაუღებლად წვიმს. სცენა და გასახდელები კაპიტალურადაა აგებული, ხოლო მაყურებელთა დარბაზი – „ბრიზენტით“ გადახურული დიდი კარავია.

კონცერტის დროს ერთ ადგილზე წვიმის წყლის სიმძიმეს „ბრეზენტმა“ ვერ გაუძლო და დაბლა ჩამოიზნიქა. ერთმა „მოხერხებულმა“ მაყურებელმა გადაწყვიტა, ქოლგით აეწია „ბრეზენტი“ წყლის გადმოსაღვრელად… მოხდა ის, რაც უნდა მომხდარიყო, – გასკდა „ბრეზენტი“ და ირგვლივ მსხდომი მაყურებელი მთლიანად გაილუმპა.

მსახიობები და მაყურებლები ერთად ვხარხარებდით…

 

iumori-#4-(1)

რისი სუნია, ბიჭო…

კონცერტი გვაქვს ვანში. სცენაზე ბატონი თენგიზ ჩანტლაძე თავის ამპლუაშია. ჩემი შესვლის დროა, დამავიწყდა, გარეთ ვარ გასული… მეძახიან, – ბიჭიკო, შენი შესვლის დროა. მეც სიბნელეში გამოვიქეცი, სასწრაფოდ შევვარდი სცენაზე. დიალოგი მაქვს თენგიზთან, მივუახლოვდი. უცებ ბატონ თენგიზს სახე დაემანჭა და ჩუმად დამისისინა, – რა სუნია, ბიჭო, ახლავე გადი სცენიდან. დიალოგი ჩაიშალა. თურმე სიჩქარეში ფუნაში ჩამიკრავს ფეხი და ისეთი სუნი დადგა სცენაზე… გამომაგდებდა, აბა რა…