2 ოქტომბრის ადგილობრივი თვითმმართველობის არჩევნების ჩასატარებლად, საუბნო საარჩევნო კომისიების წევრობის მსურველთა რეგისტრაციის ვადა ამოიწურა.

საქართველოს მასშტაბით, 73 საარჩევნო ოლქის 3 664 საარჩევნო უბანში კომისიის წევრობის 29 312 ვაკანტურ ადგილზე კონკურსში 31 483 პირი ჩაერთო.

2 153 საარჩევნო უბანში (უბნების საერთო რაოდენობის 58,76%), 8 საკონკურსო ადგილზე ზუსტად 8 განაცხადი შევიდა.

საოლქო საარჩევნო კომისიებში საუბნო კომისიების დაკომპლექტება 15 აგვისტოს დაიწყო.

2 ოქტომბრის ადგილობრივი თვითმმართველობის არჩევნებზე საუბნო საარჩევნო კომისია 17-წევრიანი იქნება. მათგან 8 წევრს საოლქო კომისია ირჩევს, ხოლო 9 წევრს უფლებამოსილი პარტიები ნიშნავენ.

#48 ხარაგაულის საოლქო საარჩევნო კომისიამ საუბნო კომისიების წევრთა შესარჩევად კენჭისყრა 15 აგვისტოს გამართა. საოლქო საარჩევნო კომისიის 17 წევრიდან სხდომას 14 ესწრებოდა, კომისიის 3 წევრს კორონავირუსი დაუდასტურდა და ამიტომ, ისინი სხდომაში ონლაინ ერთვებოდნენ.

#48.01 დაბა ხარაგაულის, და #48.31 ხიდრის საარჩევნო უბნებზე კონკურსში 10 კონკურსანტი მონაწილეობდა. #48.02 პატარა ხარაგაულის, #48.11 კიცხის, #48.15 მარელისის, #48.19 ქვების საარჩევნო უბნებზე 9-9 განაცხადი იყო მიღებული. დანარჩენ უბნებზე კი 8-8 განაცხადი იყო შესული.

კომისიების წევრებმა შერჩეული კანდიდატები ერთხმად აირჩიეს.

ხარაგაულში საუბნო საარჩევნო კომისიების წევრთა შესარჩევად გამართულ კენჭისყრაში მონაწილეობა არ მიიღეს პ/გ „ევროპული საქართველოს“ წარმომადგენელმა ნატო წარიაშვილმა და პ/გ „ერთიანი ნაციონალური მოძრაობის“ წარმომადგენელმა თამარ მაღლაფერიძე.

„საუბნო კომისიების შემადგენლობას რომ გადავხედე, ყველა ეს ადამიანი მმართველ პარტიასთანაა დაკავშირებული და მისი ინტერესების გამტარებლები არიან. ამიტომ კენჭისყრაში მონაწილეობას არ ვიღებ,“ – ამბობს ნატო წარიაშვილი.

თამარ მაღლაფერიძე განმარტავს, რომ მას კანდიდატებთან გასაუბრებისა და მათი უკეთ გაცნობის შესაძლებლობა არ მიეცა. ის მიიჩნევს, რომ კონკურსი გამჭვირვალე არ არის.

#48 ხარაგაულის საოლქო საარჩევნო კომისიის მდივნის, მაყვალა სულაქველიძის, ინფორმაციით, კონკურსში სულ 303 ადამიანი მონაწილეობდა. მათგან კომისიამ 296 პირი უნდა აირჩიოს.

„#48.21 სარგვეშის საუბნო საარჩევნო კომისიის წევრობისათვის სულ რვა განაცხადი შემოვიდა. თუმცა ერთი კანდიდატი წინა  არჩევნებზე პოლიტიკური პარტიის წარმომადგენელი იყო უბანზე. ამის გამო მას კონკურსში მონაწილეობაზე უარი ეთქვა“, – ამბობს მაყვალა სულაქველიძემ.

ხარაგაულის საოლქო საარჩევნო კომისიამ სარგვეშის უბნის ვაკანსიაზე კონკურსი უკვე გამოაცხადა. #48.21 სარგვეშის საარჩევნო უბანზე მერვე წევრი საოლქო კომისიამ 17 აგვისტოს უნდა აირჩიოს.