ხარაგაულის საპატიო მოქალაქე, მეორე მსოფლიო ომის ვეტერანი გიორგი (ჟორა) ბლუაშვილი, დღეს, პირველ აპრილს, 95 წლის გახდა.

გიორგი ბლუაშვილი მეორე მსოფლო ომის დროს იბრძოდა ხარკოვში, კიევში, ბრესტში, ვარშავასა და ბერლინში… ის ქალაქ ბრესტის საპატიო მოქალაქეა.

ომში გამოჩენილი მამაცობისათვის მიღებული აქვს – სტალინის 14, ჟუკოვის 1, არმიის სარდლის 2 მადლობა; 12 საიუბილეო მედალი, საპატიო ნიშნის ორდენი, ღირსების ორდენი, დიდი სამამულო ომის პირველი ხარისხის ორდენი, წითელი ვარსკვლავის ორი ორდენი, ვახტანგ გორგასლის მეორე ხარისხის ორდენი.

1952-1995 წლებში გიორგი ბლუაშვილი ხარაგაულის კინოფიკაციას ხელმძღვანელობდა.

„ვარ ძალიან კაცთმოყვარე. ჩემთვის ცუდი ადამიანი არ არსებობს. არც მახსოვს, ვინმეს დავმდურებოდე. დიდი სიყვარულით ვარ ადამიანების მიმართ განწყობილი,“ – ამბობს გიორგი ბლუაშვილი „ჩემი იმერეთის“ რედაქციასთან სამი წლის წინანდელ ინტერვიუში.

გასულ ზაფხულს ომის ვეტერანს ხარაგაულში ვიზიტისას ამერიკის ელჩის მოვალეობის შემსრულებელი ელიზაბეთ რუდი ესტუმრა.

ვულოცავთ ღირსეულ ხარაგაულელს 95 წლის იუბილეს და დღეგრძელობას ვუსურვებთ.

ფოტოზე: გიორგი ბლუაშვილი ელიზაბეთ რუდთან ერთად