ხარაგაულის სკოლამდელ დაწესებულებათა გაერთიანებაში შემავალ 17 საბავშვო ბაღში დღეს, 7 თებერვალს, პროექტი „მამა მიკითხავს ზღაპარს“ დაიწყო.

ამ გაერთიანების დირექტორმა, მამუკა ჭიპაშვილმა აღნიშნა, რომ მამების ჩართულობა სასწავლო-სააღმზრდელო პროცესში ძალიან მნიშვნელოვანია.

„სტატისტიკურად გამოკვლეულია, რომ პატარებს ზღაპარს დედების 97%, ხოლო მამების 3% უკითხავს. ამის გამო მოვიფიქრეთ და განვახორციელეთ პროექტი „მამა მიკითხავს ზღაპარს“. მამების ჩართულობით შემდგომშიც არა ერთ პროექტს დავგეგმავთ“, – ამბობს მამუკა ჭიპაშვილი.

ხარაგაულის #1 საბავშვო ბაღის 5-6 წლიანთა ჯგუფის აღსაზრდელებს იაკობ გოგებაშვილის მოთხრობა „მეფე ერეკლე და ინგილო ქალი“ აღსაზრდელ ერეკლე კურტანიძის მამამ, გივი კურტანიძემ, წაუკითხა. გივი კურტანიძე პატარებს საბრძოლო სიმღერებზე, იარაღებზე, მეფეებსა და ძველ ქართულ წეს-ჩვეულებებზე ესაუბრა და პატარების შეკითხვებსაც უპასუხა.

3-4 წლიანთა ჯგუფის აღსაზრდელის, გაბრიელ შარიქაძის მამამ, ლევან შარიქაძემ, პატარებს ანა კატერინა ვესტლის ზღაპარი „დედა, მამა, რვა ბავშვი და საბარგო  მანქანა“ წაუკითხა.

ხარაგაულის #1 საბავშვო ბაღში პატარებისთვის ზღაპრის წაკითხვის სურვილი ხარაგაულის ანდრია პირველწოდებულის სახელობის ეკლესიის წინამძღვარმა მამა ანტონმა (სულთანიშვილი) გამოთქვა. მოძღვარმა 3-4 წლიანთა ჯგუფში ქართული ხალხური ზღაპარი „წუნა და წრუწუნა“ წაიკითხა.

ზღაპრების კითხვის დასრულების შემდეგ სკოლამდელ დაწესებულებათა გაერთიანების დირექტორმა მამუკა ჭიპაშვილმა ბავშვებს ზღაპრის გმირები დაუხატა.

თამთა გოგოლაძე